Дэлхийн банкнаас Монголын эдийн засгийн тойм тайланг танилцууллаа.
2026 онд Монгол Улсын эдийн засаг 5 хувийн өсөлттэй байх төсөөлөлтэй гарчээ. Энэ нь 2025 оны 6.8 хувийн өсөлтөөс буурсан үзүүлэлт боловч харьцангуй тогтвортой, сайн үзүүлэлт гэж үнэлсэн байна. Өсөлт өмнөх оноос буурсан гол шалтгаан нь уул уурхайн салбарын өндөр өсөлт 2025 онд маш өндөр байсантай холбоотой аж. 2026 онд уул уурхайн салбарын өндөр өсөлтийг давтах боломжгүй гэж үзжээ.
Хөдөө аж ахуйн салбарын хувьд 2026 онд сэргэлттэй байхаар ажиглагдаж байгаа ч 2025 онтой харьцуулахад бага хэмжээний өсөлт үзүүлэхээр ажиглагдаж байгааг мэдээллээ. Барилга, худалдаа үйлчилгээний салбар эдийн засагт эерэг нөлөө үзүүлэхээр байна. Худалдаа үйлчилгээний салбарын өсөлтийг дотоодын эрэлт нэмэгдүүлдэг.
2026 онд өрхийн хэрэглээ өсөлттэй хэвээр байх ч энэ өсөлтийн хурд саарах хандлагатай байна. Учир нь инфляцийн түвшин өндөр хэвээр байгаа нь иргэдийн бодит худалдан авах чадварыг бууруулж байгаа аж. Өмнөх жилүүдэд эрчимтэй өсөж байсан нэрлэсэн цалингийн өсөлт саарах төлөвтэй байгаа нь өрхийн орлогын өсөлтийг хязгаарлана. Иймээс орлого болон санхүүжилтийн аль аль талаас өрхийн хэрэглээ аажмаар сулрах төлөв ажиглагдаж байгаа юм. Хөрөнгө оруулалт талаас нь харвал, эдийн засгийн өсөлтийг дэмжихээр харагдаж байгаа бөгөөд ялангуяа, төрийн санхүүжилтээр хэрэгжүүлж буй арга хэмжээнүүд нь эдийн засгийн өсөлтийг тодорхой хэмжээнд дэмжихээр байна. Харин хувийн хэвшлийн аж ахуйн нэгжүүдийн хувьд нөхцөл байдал харьцангуй хоёр талтай байна. Банкууд сүүлийн жилүүдэд бизнесийг дэмжих чиглэлээр зээлийг илүү түлхүү олгож ирсэн нь аж ахуйн нэгжүүдэд хөрөнгө оруулалт хэлбэрээр эерэг нөлөө үзүүлнэ гэж үзжээ. Нөгөө талаас түлш, шатахууны үнийн өсөлт үйлдвэрлэлийн зардлыг нэмэгдүүлж байгаа нь дотоодын үйлдвэрлэгчдийн зардлыг нэмэгдүүлж, бизнес эрхлэгчдийн хувьд дарамт болж байна. Үүний улмаас аж ахуйн нэгжүүдийн хувьд үйл ажиллагаагаа тэлэх, хөрөнгө оруулалтаа нэмэгдүүлэх боломж харьцангуй хязгаарлагдмал хэвээр байх төлөв ажиглагдаж байна. Эндээс харахад, инфляц 2026 онд 8.5 хувьд хадгалагдах төсөөлөл гарсан. Энэ ондоо гадаад тэнцэл дээр дарамт нэмэгдэхээр байна. Экспортын орлогоо харахаад нүүрсний үнэ доогуур түвшинд хадгалагдахаар байгаа учир барааны тэнцэл дээр алдагдал тэлэх хандлагатай байгааг мэдээллээ. Төсөөллийн хувьд эдийн засгийн өсөлт 5 хувь байгаа ч эрсдэл сөрөг тал руугаа давамгайлж байгааг онцгойлон анхаарууллаа.
