Air India компани онгоцны түлшний үнэ огцом өсөлтөөс шалтгаалан 100 орчим нислэгээ цуцлав. Энэ нь АНУ–Израилийн Ираны эсрэг дайны улмаас нисэхийн салбарт үүссэн дарамтыг улам нэмэгдүүлж байна.
Гүйцэтгэх захирал Кэмпбелл Уилсон 5-р сард олон улсын нислэгүүдийг аль хэдийн бууруулсан бөгөөд түлшний үнэ өсөх, агаарын орон зай хаагдах зэрэг нь маршрутуудыг ашиггүй болгож байгааг мэдэгдлээ.
“Түлшний үнэ огцом өссөн, агаарын орон зай хаагдсан, нислэгийн зам уртссан нь олон улсын нислэгүүдийг ашиггүй болгож байна” гэж Кэмпбелл Уилсон ажилтнуудад илгээсэн захидалдаа дурджээ.
Энэтхэгийн Нисэхийн холбоо мөн салбар “маш их дарамтад орж, үйл ажиллагаагаа зогсоох эрсдэлтэй” байгааг анхааруулсан байна. Энэтхэг улс түүхий нефтийнхээ 88 хувийг импортолдог тул дэлхийн зах зээлийн үнийн хэлбэлзэлд маш эмзэг.
Ойрхи Дорнод дахь мөргөлдөөнөөс үүдэлтэй түлшний хямрал бусад оронд ч нөлөөлж эхэлжээ. United Airlines болон Lufthansa компаниуд нислэг цуцлах эсвэл үнэ нэмэх талаар хэлэлцэж байна.
Air India компани 6-р сард Европ, Хойд Америк, Австрали, Сингапур чиглэлийн нислэгүүдээ бууруулна гэж мэдээлсэн.
Уилсон хэлэхдээ компани аль хэдийн алдагдалтай ажиллаж байгаа тул 7-р сар хүртэл нислэгийн хуваариа танахаас өөр аргагүй болсон байна. Онгоцны түлш нь нийт зардлын 40 орчим хувийг эзэлдэг.
Тэрбээр “Бид зорчигчид болон ажилтнуудаас хүлцэл өчиж байна. Ойрхи Дорнодын нөхцөл байдал тогтворжиж, Ормузын хоолой нээгдэнэ гэж найдаж байна” гэжээ.
Air India нь Tata Group-ийн эзэмшилд байдаг бөгөөд 2022 онд Энэтхэгийн засгийн газраас худалдан авсан. Өнгөрсөн онд 433 сая ам.долларын алдагдал хүлээсэн бол Пакистаны агаарын орон зайг хааснаас жилд 600 сая ам.долларын нэмэлт алдагдал хүлээх төлөвтэй гарчээ.
