Нийслэлийн онцгой байдлын газраас галлагааны аюулгүй байдал, угаарын хийн асуудлаар НОБГ-т мэдээлэл хийлээ.

Нийслэлийн Агаар, орчны бохирдолтой тэмцэх газрын дарга Д.Мөнхбаатар “ Нийслэлийн хэмжээнд есдүгээр сар гарснаас хойш угаарын хийн хордлогын 49 дуудлага, мэдээлэл бүртгэгдсэн. Улмаар 152 иргэн угаарын хийн хордлогод өртсөн байна. Угаарын хийн хордлогод өртсөн иргэдийг шалтгаан нөхцөлөөр нь задалбал, хоёр өрх яндангаа хөөлөөгүй, зуухны битүүмж алдагдсан долоо, яндан зуухыг салгаж, өрхөө битүүлсэн 35, зуух яндан гэмтсэн гурав , яндан халаалт, сойлт хаасан хоёр өрх тус тус өртсөн байна.

49 өрхөөс нийт 38 өрх нь угаарын хийн мэдрэгчгүй, нэг өрх угаарын хийн энгийн мэдрэгчтэй, арван өрх ухаалаг төхөөрөмжтэй байсан.

Сүүлийн өдрүүдэд Нийгмийн эрүүл мэндийн үндэсний төвөөс долоо хоногт таван иргэн угаартаж нас барсан мэтээр  ташаа мэдээлэл түгээж нийгмийн сэтгэл зүйд сөргөөр нөлөөллөө. СХД, Налайх дүүрэгт хоёр өрхийн гурван иргэн бороотой өдрүүдэд яндангаа авч, өрхөө битүүлж угаартсан гэх мэдээлэл үнэн. Харин хоёр иргэн гал түймэрт өртөж нас барсан. Үүнийг Нийгмийн эрүүл мэндийн үндэсний төвөөс угаартаж нас барсан мэтээр ташаа мэдээлэл түгээсэн байна. 

Нийслэлийн зүгээс угаарын хийн мэдрэгчийн асуудлаар ажлын хэсэг гараад бүх айл өрхүүдээр явж сэримжлүүлэг, шалгалт хийж байгаа. Бидний зүгээс мөн "Хотулла" аппыг ашиглаад угаарын хий мэдрэгдэвэл бүх гишүүдэд мэдээлэл ирдэг байдлаар тухайн аппыг хөгжүүлээд явж байна.

Угаарын хийн өнгөгүй, үнэргүй, амтгүй. Иймээс өнгөц харахад унтарсан мэт харагдаж байгаа ч дотроо түлш нь уугаж байдаг. Иймд яндангаа сугалж, өрхөө битүүлэхгүй байхыг иргэдээс хүсэж байна. Иргэдийн хувьд бороотой өдрүүдэд угаартах эрсдэл их байна. Иймд заавал яндан, зуухны аюулгүй ажиллагааг шалгаж, угаарийн хийн мэдрэгчээ ажиллаж байгаа эсэхийг хянах хэрэгтэй.

Түүнчлэн, нийслэлийн хэмжээнд 172 мянган айл өрхөд алсын зайн дамжуулагчтай угаарын хийн мэдрэгчээр хангах ажлыг хийж байгаа. Одоогийн байдлаар бид 130 мянган айл өрх дээр уг төхөөрөмжийг суурилуулсан. Мөн нийслэлээс дахин 45 мянган угаарын хийн төхөөрөмжийг авах төсвийг зарлаж тендерийг зарласан. Удахгүй бид бүх айл өрхийг ухаалаг төхөөрөмжөөр хангана. Өмнө нь тараасан угаарын хийн төхөөрөмж гурван жилийн хугацаатай байсан. Иймд иргэдийг одоо шинэ төхөөрөмжөөр хангах ажлыг шат дараатайгаар хийж байна" гэлээ.