Ердөө хоёр хоногийн дараа шинэ хичээлийн жил эхэлнэ. Гэвч салбар яам, салбарын ажилчдын толхилцоо шийдэлд хүрээгүй хэвээр л байна.

Эргэн сануулбал, багш нар цалингаа нэмүүлэхийг шаардаж, шаардлага биелэлээ олоогүй тохиолдолд ажил хаялт зарлана гэдгээ олон нийтэд мэдээлсэн юм. Энэ талаар Монголын багш нарын үйлдвэрчний эвлэлийн холбооны дарга Д.Мөнхбаатар “Багшийн үндсэн цалинг нэмэхгүй бол ажил хаялтад шилжихээс өөр аргагүй. Өнөөдөр улсын сургуулиуд нийгмийн даатгалын өртэй, эрүүл мэндийн зардал шийдэгдээгүй байна. Хичээлийн шинэ жил эхлэх гэж байхад энэ асуудлыг шийдэхгүй бол багш нар гудамжинд гарч, ажлаа хаяна” гэсэн юм.

Багш нарын “Цалин нэмэхгүй бол ажил хаяна” гэх эсэргүүцлийг Боловсролын сайд зүй ёсных гэж үзсэн. Тэрээр багш нарын цалинг жил бүр хамгийн ихдээ 20 хувиар нэмэх боломжтой гэдэг мэдээлэл өгсөн. Гурван яамны хамтарсан ажлын хэсэг ч энэ талыг барих чигтэй байгаа аж.

Тэрээр энэ талаар “Багш нарын тавьж байгаа шаардлагыг зүйтэй гэж харж байгаа. Учир нь төрийн үйлчилгээний албаны хамгийн бага үндсэн цалинтай нь багш нар. Тиймээс багш нарын үндсэн цалинг дорвитой өсгөх шаардлагатай байгаа. Өнгөрсөн жил зургаан хувиар нэмсэн ч энэ хангалтгүй. Тиймээс Засгийн газрын зүгээс ажлын хэсэг байгуулсан. Сангийн яам, Гэр бүл, хөдөлмөр, нийгмийн хамгааллын яам, Боловсролын яам болон Үйлдвэрчний эвлэл оролцсон. Бид энэ жилийн төсвийн хэмнэгдсэн хэсгээс багшийн цалинг өсгөх бодлого барина. Өөр эх үүсвэр бий болгох үүргийг Ерөний сайд өгсөн. Ерөнхий сайд гурван жилийн хугацаанд багшийн цалинг тогтвортой өсгөх төлөвлөгөө гаргаж, эх үүсвэртэй нь танилцуулах даалгавар мөн өгсөн” гэсэн юм.

Ажлын хэсэг багшийн цалинг хэрхэн өсгөхөөр шийдвэрлэсэн болохоо танилцуулах сүүлийн хугацаа өнөөдөр. Наймдугаар сарын 30-ны дотор шийдвэрийг олон нийтэд зарлана гэж салбарын сайд мэдээлж байсан юм.

Энэ хичээлийн жилд боловсролын бүх шатны 2450 гаруй байгууллагад 1 сая 29 мянга орчим хүүхэд, залуус суралцана гэдгийг Боловсролын Ерөнхий газар мэдээлсэн. Тэгэхээр багш нар Монгол Улсын нийт хүн амын гуравны нэгийг сурган, хүмүүжүүлэх хүндтэй алба хашиж буй. Гэвч ЕБС-ийн багш нарын үндсэн цалин 1,484,000 төгрөг байна.

Үндсэн цалин дээр дараах нэмэгдлүүд бодогдоно:

Мэргэжлийн зэргийн нэмэгдэл:

• Зөвлөх – 20 хувь

• Тэргүүлэх – 15 хувь,

• Заах аргач – 10 хувь нийт багшийн 58-62 хувь нь авч байна.

• Докторын зэрэг- 20 хувь нийт багшийн 0,8 хувь нь авч байна.

Орон нутгийн багш нар :

• Аймгийн төв-20 хувь,

• Сумын төв – 40 хувь нийт багшийн 58 хувь нь авч байна.

Бусад нэмэгдэл:

• Анги даасан- 10 хувь,

• Заах аргын нэгдэл удирдсан- 5 хувь

• Кабинет лаборатори хариуцсан- 5 хувь

• Илүү цаг- 7 хоногт 19 цагаас илүү заасан цагийг "илүү цаг-т тооцдог. Илүү цаг үндсэн цалингийн 1,5 хувиар бодогддог. Тусгай сургууль нэмэгдэлтэй.

Ийнхүү нэмэгдэлтэйгээ нийлээд сард 3 сая 800 төгрөгийн цалин авч байгаа 1000 гаруй багш байна гэсэн судалгаа гарчээ.

Хэрэв 20 хувиар нэмбэл үндсэн цалин 1,780,800 төгрөг болно. Өөрөөр хэлбэл багш тус бүрийн үндсэн цалин 296,800 төгрөгөөр нэмэгдэх юм.

Харин СӨБ-ын багшийн үндсэн цалин 1,559,000 төгрөг байна. Ингээд тооцвол 311,800 төгрөгөөр нэмэгдэж 1,870,800 төгрөг болохоор байгаа юм.