Монголын эрчим хүч, геологи, уул уурхайн үйлдвэрчний холбооноос эрчим хүчний салбарт тулгамдаж буй асуудлаар мэдээлэл хийлээ. 

ЭХГУУҮХ-ны ерөнхий нарийн бичгийн дарга Н.Дагвадорж" Эрчим хүчний салбарынхан энэ оны 10-р сарын 9-нд "Ажилтнаа сонсъё" зөвлөгөөнийг зохион байгуулсан. Уг зөвлөгөөнөөр тус салбарын ажилтнууд асуудлаа дотроо хэлэлцэж, эрх бүхий албан тушаалтнуудад хүргүүлсэн. Гэвч салбарын удирдлагууд, ялангуяа сайд ажилтнуудын төлөөлөлтэй нэг ч удаа уулзаагүй. Бид өмнөх Засгийн газарт Б.Чойжилсүрэнг мэргэжлийн бус хүн учир сайдаар ажиллуулмааргүй байна гэх шаардлагыг тавьж байсан. Гэвч дараагийн Засгийн газарт ахиад л ороод ирсэн. Бидний саналыг нэг ч удаа сонсоогүй.

Эрчим хүчний салбарын реформ гэдэг нь Үндэсний хороо, компани байгуулаад шийдэгддэг асуудал биш. Хууль эрхзүйн шинэчлэлээс л эхэлнэ. Энэ нь хууль эрх зүйн шинэчлэлээс эхэлнэ. Эрчим хүчний 2001 онд батлагдаж байсан хууль өнөөдөр энэ салбарыг зохицуулах боломжгүй болсон. Манай салбарт хүний нөөцийн дутагдалд орж, ажиллах хүнгүй болоод байна гэж байхад цомхотгол явагдаад байна. Тухайлбал, Үйлдвэрчний эвлэлийн хороонд 50 ажилтныг цомхотгох албан бичиг хүргүүлсэн. Энэ бол Хөдөлмөрийн тухай хуульд зааснаар бөөнөөр халж байгаа зохицуулалтад хамаарна. Энэ үед цомхотголд өртөж байгаа ажилтнуудын дараагийн ажлын байр, нийгмийн хамгааллын асуудал, тэтгэмжийн талаар хэлэлцэж, гэрээ байгуулах ёстой. Гэтэл үүнээс зайлсхийж, нэг нэгээр нь дуудаж тушаалыг нь өгч байгаа нь хуулийн зөрчил юм" гэлээ.  

Эрчим хүчний салбарын ажилтнуудаас дараах шаардлагыг холбогдох албан тушаалтнуудад хүргүүллээ.

Тодруулбал,

• УИХ-д Төрийн хэмнэлтийн хуульд өөрчлөлт хийх шаардлагыг хүргүүлж байна. Хэмнэлт хийх газраа хийгдэхгүй ажилтнуудад хийгдээд байгаа.
• Засгийн газрын 370-р тогтоол гэж бий. Түүнд сайдын зөвлөлд ажилтны болон ажил олгогчийн төлөөлөл байх ёстой. Гэтэл Эрчим хүчний сайдын зөвлөлд манай холбооны төлөөлөл байхгүй. Иймд Засгийн газрыг Эрчим хүчний сайддаа 370-р тогтоолыг үүрэг болгохыг шаардаж байна.
• Эрчис Монгол компанийг татан буулга. Энэ бол манай салбарт ямар ч нэмэр болохгүй байна.
• Мөн 20-30 жил ажиллаж байгаа 2-3 сая төгрөгийн цалин авч байгаа хүмүүсийн дэргэд гаднаас ирсэн 3-4 менежер 5-6 сая төгрөгийн цалин аваад ажлын өрөө, машины хангамж эдэлж байгаа нь зохисгүй байна. Хууль зөрчсөн шийдвэрээ боль.
• Эрчим хүчний яаманд 2026 оны нэгдүгээр сарын 1-нээс эрчим хүчний салбарын ажилтнуудын цалинг 30-аас доошгүй хувиар нэмэгдүүлэх шаардлага хүргүүлж байна.
• Манай салбарын удирдлагуудын алдаатай шийдвэрүүдийг хаацайлахгүйгээр ил тод, нээлттэй хэлэлцэж, хариуцлага тооцдог байх хэрэгтэй.
• Эрчим хүчний салбарын засаглалыг нээлттэй болгож ажилтнуудын нийгмийн хамгааллын асуудлыг шийдвэрлэх шаардлагатай байна.