Амиа алдсан хүмүүсийн дунд Эквадорын тагнуулын байгууллагын тэргүүн Микеле Сенси-Контуги болон NBCUniversal-ийн сэтгүүлч Хосе Суарес багтжээ.
Жуулчдыг сафари аялалд авч явж байсан нисдэг тэрэг Кенийн хойд нутгийн алслагдсан бүсэд осолдож, онгоцонд байсан долоон хүн бүгд амиа алдлаа. Амиа алдсан хүмүүсийн дунд Эквадорын төрийн албан тушаалтан болон АНУ-ын сэтгүүлч байжээ.
Кенийн Иргэний нисэхийн ерөнхий газрын мэдээлснээр, нисдэг тэрэг лхагва гарагийн өглөө орон нутгийн цагаар 09:13-т буюу Гринвичийн цагаар 06:13-т Лойсаба хамгаалалтын бүсээс Самбуру мужийн Эвасо Ньиро орчим руу нисэж явахдаа осолдсон байна. Ослын шалтгааныг тогтоох мөрдөн шалгах ажиллагаа эхлээд байгаа аж.
Дотоодын агаарын тээврийн компаниудаар жуулчдыг Ололокве уул зэрэг алслагдсан газрууд руу тээвэрлэдэг, аялал жуулчлалын салбар идэвхтэй хөгжсөн Кенид нисдэг тэрэгний осол сүүлийн жилүүдэд давтамжтай гарах болсон байна.
Албаны хүмүүсийн мэдээлснээр нисдэг тэргэнд зургаан зорчигч болон нисгэгч, нийт долоон хүн сууж байжээ.
Лхагва гарагийн орой Эквадорын Тээврийн сайд Роберто Луке тус улсын тагнуулын байгууллагын тэргүүн Микеле Сенси-Контуги болон түүний эхнэр Стефани Холлихан нар ослоор амиа алдсан хүмүүсийн дунд байсныг мэдэгджээ.
АНУ-ын NBCUniversal мөн тус компанийн сэтгүүлч Хосе Альберто Суарес ослоор амиа алдсан хүмүүсийн нэг болохыг мэдэгдсэн байна. Тэрээр Telemundo 31, Telemundo 49 болон Telemundo Fort Myers–Naples сувгуудын ерөнхийлөгч бөгөөд ерөнхий менежерээр ажиллаж байжээ.
АНУ-ын Төрийн департаментын төлөөлөгчийн мэдээлснээр, амиа алдсан хүмүүсийн тав нь АНУ-ын иргэн байжээ.
Тэрээр “АНУ-ын Элчин сайдын яам орон нутгийн эрх баригчидтай холбоотой ажиллаж, консулын туслалцаа үзүүлж байна. Амиа алдсан хүмүүсийн ар гэр, ойр дотнын хүмүүст гүн эмгэнэл илэрхийлье” гэжээ.
Цогцос гаргах ажиллагаа үргэлжилж байна
Орон нутгийн хэвлэлүүдийн мэдээлснээр нисдэг тэрэг Кенийн аялал жуулчлалын алдартай бүс болох Ололокве уулын бэл дэх бартаатай газарт осолдсон байна.
Нисдэг тэрэг нь орон нутгийн Lady Lori Helicopters компанийн эзэмшлийнх бөгөөд &Beyond аялал жуулчлалын компанийн үйлчлүүлэгчдийг тээвэрлэж явжээ. Lady Lori Helicopters компанийн мэдэгдсэнээр уг нисдэг тэрэг захиалгат нислэг үйлдэж байх үедээ осолдсон байна.
Орон нутгийн сафари аяллын оператор Tropic Air Kenya эрэн хайх, аврах ажиллагаанд туслахаар хоёр нисдэг тэрэг илгээснээ мэдэгджээ.
Иргэний нисэхийн байгууллагын мэдээлснээр осолдсон агаарын хөлөг нь Eurocopter EC130 B4 загварын нисдэг тэрэг байсан байна.
Кенийн Улаан загалмай нийгэмлэгийн мэдээлснээр, тэдний шуурхай хариу арга хэмжээний багууд олон байгууллагын хамтарсан ажиллагаанд оролцож, аврагчид ослын газарт хүрэхээр ажиллаж байна.
Кенийн Daily Nation сонины мэдээлснээр, лхагва гарагийн оройн байдлаар гурван хүний цогцос нисдэг тэрэгний сүйрэлд гацсан хэвээр байсан бөгөөд ослын газарт гал үргэлжилж байсан тул цогцсыг гаргах ажиллагааг пүрэв гарагт үргэлжлүүлэхээр болжээ.
Энэ оны хоёрдугаар сард мөн Кенийн баруун нутгийн уулархаг бүсэд нисдэг тэрэг осолдож, парламентын нэг гишүүн тэргүүтэй зургаан хүн амиа алдсан байна.
