Сурагчдын дунд хеликобактерийн халдвараас урьдчилан сэргийлэх төсөл, арга хэмжээ хэрэгжүүлэх болон умайн хүзүүний хавдрын эсрэг вакцины талаар НЗД-ын орлогч А.Амартүвшин мэдээлэл өглөө.

Тэрээр “НҮБ-ын Хүүхдийн сантай хамтран хэрэгжүүлэх хеликобактерийн халдвараас сэргийлэх ажлыг энэ сараас эхлүүлэхээр болсон. Уг ажил нь нэг удаагийн арга хэмжээ биш, 3-4 жилийн хугацаанд хэрэгжих хөтөлбөр юм.

Эхний ээлжид улсын болон хувийн сургууль, цэцэрлэгүүдэд очиж шинжилгээ авна. Улмаар НЭМГ-тай хамтран хеликобактерийн эмчилгээг эхлүүлнэ. Дараа нь сургууль, цэцэрлэгүүдэд ариутгал хийдэг болно. Нийслэлийн зүгээс энэ жил 9.8 тэрбум төгрөгийг зарцуулж, сургууль, цэцэрлэгийн орчинд аяга таваг угаагч, ариутгагчаар хангана. Харин хувийн сургууль, цэцэрлэгүүдэд стандартыг мөрдүүлэх чиглэлээр шаардлага тавьж, хэрэгжилтийг хангуулна.

Одоогоор бид умайн хүзүүний хорт хавдрын эсрэг вакцинжуулалтын ажлыг хэрэгжүүлээд, амжилттай явж байгаа. Харин өнөөдрөөс эхлэн Улаанбаатар хотод амьдарч буй бүх хүүхдийг хеликобактерийн халдварын эсрэг урьдчилан сэргийлэх арга хэмжээнд хамруулна.

Цаашид энэ асуудлыг ул суурьтай шийдвэрлэж, хүүхдүүдийн эрүүл мэндийг сайжруулахад анхаарч ажиллана” гэлээ.