Япон улсын Дээд шүүх 2023 онд тухайн үеийн Ерөнхий сайд Фумио Кишидад халдсан 27 настай этгээдэд оноосон 10 жилийн хорих ялыг хэвээр үлдээсэн анхан шатны шүүхийн шийдвэрийг баталлаа.
Тус улсын Дээд шүүхийн Гуравдугаар танхим, шүүгч Кимихиро Ишиканэгийн удирдлага дор давж заалдах гомдлыг хэрэгсэхгүй болгожээ.
Рюжи Кимураг хүн алахыг завдсан, нийтийн албан тушаалтны сонгуулийн тухай хууль зөрчсөн зэрэг нийт таван зүйл ангиар буруутгагдсан байна. Шүүхийн шийдвэр нь таван шүүгчийн санал нэгтэй шийдвэрээр эцэслэн баталгаажжээ.
Шүүхийн тогтоолд дурдсанаар 2023 оны дөрөвдүгээр сарын 15-нд Кимура Вакаямa хотын Сайказаки загас агнуурын боомтод болсон сонгуулийн сурталчилгааны үеэр Кишида болон бусад руу тэсрэх төхөөрөмж шидсэн бөгөөд тухайн үеийн Ерөнхий сайдыг алах зорилготой байсан гэж үзжээ.
Кишидаг аюулгүй нүүлгэн шилжүүлсэн боловч хоёр хүн бэртсэн байна.
Өмгөөлөгч тал хүний амь хөнөөх санаа байгаагүй, зөвхөн халдлага үйлдсэн хэрэг гэж мэдэгдсэн ч 2025 оны хоёрдугаар сард Вакаяама дүүргийн шүүх шүүгдэгч хүний амь нас хохирох эсэхийг үл хайхарсан гэж дүгнэжээ.
Мөн шүүх Кимура нь тэсрэх төхөөрөмж ашиглан Кишидад ойртож дэлбэлснээр олон нийтийн анхаарлыг татаж, өөрийн сонгуулийн тогтолцооны талаарх үзэл бодлыг сурталчлах зорилготой байсан гэж үзсэн байна.
Шүүх тухайн үеийн Ерөнхий сайдыг онилсон халдлага нь нийгэмд өргөн хүрээний айдас, түгшүүр үүсгэсэн гэж үзэн 10 жилийн ял оноох нь зохистой гэж дүгнэжээ.
2025 оны есдүгээр сард Осакагийн Дээд шүүх давж заалдах шатны гомдлыг хэрэгсэхгүй болгож, анхан шатны шүүхийн шийдвэр үндэслэлтэй, баримтын алдаа байхгүй гэж үзсэн байна.
