Тус компаниуд Apple-ийг өрсөлдөгч хиймэл оюуны чатботуудаас OpenAI-ийн ChatGPT-ийг илүүд үзсэн хэмээн буруутгаж байсан юм.
Элон Маскийн X Corp болон SpaceXAI компани Apple-ийн эсрэг гаргасан монополийн эсрэг нэхэмжлэлээ татан авч, iPhone үйлдвэрлэгчийг OpenAI-тай хуйвалдан, өрсөлдөгчдөө үүсгүүр хиймэл оюуны зах зээлээс шахан гаргахыг завдсан хэмээн буруутгасан хуулийн маргааныг эцэслүүлжээ.
Тус компаниуд даваа гарагт шүүхэд гаргасан баримт бичигтээ Apple-ийн эсрэг гаргасан нэхэмжлэлүүдээ хэрэгсэхгүй болгуулахаар хүсэлт гаргаснаа мэдэгдсэн байна. Уг баримт бичигт шийдвэрийн шалтгаан, талууд тохиролцоонд хүрсэн эсэхийг ч мэдээлээгүй аж.
2025 оны наймдугаар сард Техас мужийн Форт-Уэрт хот дахь АНУ-ын холбооны шүүхэд гаргасан нэхэмжлэлдээ X болон SpaceXAI компани Apple, OpenAI-ийг ChatGPT-ийг Apple-ийн iPhone үйлдлийн системд нэгтгэсэн цорын ганц үүсгүүр хиймэл оюуны чатбот болгосон тохиролцоогоороо АНУ-ын монополийн эсрэг хуулийг зөрчсөн хэмээн буруутгажээ.
Grok чатботыг хөгжүүлэгч X болон SpaceXAI компаниуд Apple-ийн уг зохицуулалт нь Siri, Apple-ийн Writing Tools болон iPhone-ийн камер зэрэг функцээр дамжуулан ChatGPT-д хэдэн тэрбум боломжит хэрэглэгчийн асуултад нэвтрэх боломж олгосон гэж үзсэн. Тэдний хэлснээр, уг тохиролцоо нь өрсөлдөгч хиймэл оюуны компаниудыг хэрэглэгчдэд хүрэх боломжгүй болгож, өрсөлдөгчдийн цар хүрээг нэмэгдүүлэхэд хүндрэл учруулжээ.
Мөн тус компаниуд Apple-ийг App Store-оороо дамжуулан өрсөлдөгч хиймэл оюуны чатботуудыг хохироосон гэж мэдэгдсэн юм. Үүнд, аппликейшний хянан шалгах үйл явцыг удаашруулсан, эрэмбийг нь өөрчилсөн зэрэг үйлдлийг дурджээ.
X болон SpaceXAI компаниуд нэхэмжлэлдээ Apple болон OpenAI нь ухаалаг утас, хиймэл оюуны зах зээл дэх байр сууриудаа үр дүнтэй нэгтгэж, бие биенийхээ давамгай байдлыг бэхжүүлсэн хэмээн мэдэгдсэн байна. Тэд хариуцагчдыг Шерманы монополийн эсрэг хууль болон Техас мужийн монополийн эсрэг хуулийг зөрчсөн гэж буруутгажээ.
Apple болон OpenAI өнгөрсөн онд тус нэхэмжлэлийг хэрэгсэхгүй болгуулахаар тус тус хүсэлт гаргасан. АНУ-ын дүүргийн шүүгч Марк Питтман арваннэгдүгээр сард хоёр хүсэлтийг хоёуланг нь хэрэгсэхгүй болгож, хэргийг үргэлжлүүлэхийг зөвшөөрчээ.
OpenAI шүүхэд гаргасан баримт бичигтээ Маскийг тус компанийн эсрэг “хууль зүйн дайны кампанит ажил” явуулж байна хэмээн буруутгажээ. Маск OpenAI-ийн эсрэг хэд хэдэн хуулийн маргаан үүсгэсэн. Үүнд тус компани ашгийн төлөө бус, хүн төрөлхтний тусын тулд хиймэл оюун ухаан хөгжүүлэх анхны зорилгоосоо ухарсан гэж буруутгасан тусдаа нэхэмжлэл багтжээ. OpenAI уг нэхэмжлэлд ялсан тухайгаа тавдугаар сард мэдээлсэн юм.
X болон SpaceXAI компаниуд даваа гарагт Apple-ийн эсрэг гаргасан нэхэмжлэлээ татан авсан ч уг хэргийн хариуцагч хэвээр байгаа OpenAI-ийн эсрэг нэхэмжлэлүүдээ үргэлжлүүлэн хөөцөлдөнө гэж мэдэгдлээ. Тэд Apple-ийн эсрэг гаргасан нэхэмжлэлээ яагаад татан авснаа тайлбарлаагүй байна.
OpenAI-ийн ChatGPT 2022 оны сүүлээр нээлтээ хийснээс хойших хэдэн сарын хугацаанд түүхэн дэх хамгийн хурдацтай өссөн хэрэглэгчийн аппликейшн болжээ.
