WBPF буюу Дэлхийн бодибилдинг фитнессийн холбооны Азийн аварга шалгаруулах болон дэлхийн аварга шалгаруулах тэмцээн энэ сарын 30-наас ирэх сарын 5-нд Тайланд улсад болно. Тус тэмцээнд Монгол Улсаа төлөөлөн оролцох ОУХМ Л.Саруулбатаас тодруулга авлаа.
-Дэлхийн аварга шалгаруулах тэмцээний талаар мэдээлэл өгнө үү?
-Тайландын Паттаяа аралд бодибилдинг фитнессийн дэлхийн аварга шалгаруулах тэмцээн болно. Манай баг тамирчид энэ сарын 29-нд тэмцээн болох улсыг зорих гэж байна.
-Тэмцээнд манайхаас хэдэн тамирчин оролцох вэ?
-Өнөө жилийн тэмцээнд 30 гаруй тамирчин оролцохоор бэлтгэл сургуулилтаа хангаж байна. Манай спорт сонирхогчдын эчнээ танил тамирчдаас дурдвал 75 кг-ын жинд А.Бямбабаяр, Н.Чинзориг, ахмадын 49 хүртэлх насны ангилалд Л.Баянхүү, 59 хүртлэх насанд С.Дуламрагчаа, насанд хүрэгчдийн 100 кг-д Л.Баянхүү, атлетикийн төрөлд Н.Батбаяр, Д.Энх-Эрдэнэ, Г.Жамц, Т.Чахар нар оролцоно. Харин эмэгтэйчүүдэд дэлхийн аварга Г.Угалзцэцэг, ОУХМ Б.Бадамсүрэн, Г.Гансаруул нарын шилдгүүд өрсөлдөх гэж байна. Манай баг тамирчид дэлхийн аваргад 2000 оны эхээс оролцож эхэлсэн. Энэ хугацаанд энэ жилийнх шиг олон бүрэлдэхүүнтэй д оролцож байсангүй.
-Хэдий олон тамирчин явна. Төдий чинээ амжилт гаргана гэж ойлгож болох уу?
-Тэгж ойлгож болно. Түүнээс гадна Монголд фитнессийн чиглэлээр үйл ажиллагаа явуулдаг төв олширч, энэ спортоор хичээллэх хүмүүсийн тоо нэмэгдсэнтэй холбож болох юм. Энэ хэрээр тамирчдын өрсөлдөөн, ур чадвар нэмэгдэнэ. Биднийг дэлхийн дэвжээнд өрсөлдөхөд бусад орны тамирчид манай тамирчдыг эхэндээ үнэлдэггүй байсан. Харин хоёр жилийн өмнө Макаод болсон дэлхийн аваргад Ж.Нурлан ахыг түрүүлэхэд хандлага өөр болсон шүү. Энэ амжилт биднийг дэлхийд таниулсан. Биднийг тэмцээн уралдаанд оролцоход үргэлж дэмждэг холбооны ерөнхий нарийн бичгийн дарга С.Одбаатар ахдаа баярлаж явдгаа илэрхийлье. Ирэх жил бодибилдинг фитнессийн дэлхийн аварга шалгаруулах тэмцээн манай улсад болно.
