Засгийн газрын хуралдаанаас гаргасан шийдвэрийг танилцуулж байна.
Монгол Улсын Их Хурлын гишүүн, Засгийн газрын хэрэг эрхлэх газрын дарга Н.Учрал "Засгийн газрын хуралдаанаар Хөгжлийн банкийг экспорт, импортын банк болгох хуулийг хэлэлцэж танилцууллаа. Ирэх долоо хоногт уг хуулийг эцэслэн танилцуулж, УИХ-д өргөн мэдүүлэхээр ажиллаж байна. Мөн гадаадын хөрөнгө оруулагчдыг хамгаалах, хөрөнгө оруулалтын эрх зүйн тогтвортой орчныг бий болгохоор Хууль зүйн дотоод хэргийн сайдаар ахлуулсан ажлын хэсэг ажиллаж байна. Улмаар татварын, хөрөнгө оруулалтын тухай хуульд шаардлагатай нэмэлт өөрчлөлтийг боловсруулж танилцуулна. Түүнчлэн Уул уурхайн биржийн хуулийг УИХ-д өргөн мэдүүлж, хэлэлцэх үед УИХ-ын гишүүд болоод улс төрийн намын бүлгүүдээс гаргасан саналыг үндэслээд тус хуулийг дахин боловсруулж өргөн мэдүүлэхээр хуулийг Засгийн газрын зүгээс татаж авах шийдвэр гаргасан.
Үндэсний баялгийн сангийн хуулийн хэрэгжилт, хуримтлалыг нэмэгдүүлэх чиглэлээр хувийн хэвшил болон төрийн эзэмшлийн хувь хэмжээг тогтоох хэлэлцээр үргэлжилж байна. Энэ хүрээнд өнөөдрийн Засгийн газрын хуралдаанаар Тавантолгой ордын "Бор тээг"-ийн уурхайд түншлэлийн компаниудтай байгуулсан гэрээг хүчингүй болголоо. Өнгөрсөн хугацаанд бидний илрүүлсэн баримтад үндэстэн дамнасан хэлхээ бүхий схем үүсгэсэн 250 сая ам.доллар зарсныг нотолсон гурван хайрцаг баримтыг хуулийн байгууллагад шилжүүлж өгсөн. Улмаар АТГ хэрэг үүсгэж, ажиллаж эхэлсэн. Харин өнөөдөр УЕПГ-ын шийдвэрээр цагдаагийн байгууллагатай хамтарсан өргөн бүрэлдэхүүнтэй ажлын хэсэг байгуулагдан, ажиллаж байна гэх мэдээллийг өглөө. Ийнхүү мөнгө угаах, албан тушаалаа урвуулан ашигласан, татвараас зайлсхийх хэргүүдийг эрүүгийн хэрэг үүсгэн мөрдөн шалгах юм. Монголын баялгаар муур, хулган шиг тоглож байгаа ийм үйлдэл давтагдвал Монголын хууль хэрэгжих л ёстой. Үндэсний Баялгийн сангийн хууль хэрэгжих ёстой" гэв.
