Ерөнхий сайд Гашуунсухайт-Ганцмод боомтын төмөр замыг холбох, Тавантолгойн ордын хүчин чадлыг нэмэгдүүлэх Засгийн газар хоорондын хэлэлцээрийг соёрхон батлах тухай хуулийн төслийг УИХ-ын даргад өргөн мэдүүллээ. Үүнтэй холбогдуулан Аж үйлдвэр эрдэс баялгийн сайд Ц.Туваан мэдээлэл хийлээ.
Тэрээр "Засгийн газраас Гашуунсухайт- Ганцмод боомтын хэлэлцээрийг соёрхон батлуулахаар УИХ-ын даргад өнөөдөр өргөн барилаа. Олон жил гацсан төмөр замын хил холболт, нүүрсний худалдаа, уурхайн хүчин чадлыг нэмэгдүүлэх асуудлыг Засгийн газар хоорондын хэлэлцээрээр шийдвэрлэхээр арга замыг сонгож, хэлэлцээрийг байгуулсан. Харбинд хоёр улсын Ерөнхий сайд хэлэлцээрт гарын үсэг зурснаар баталгаажсан. Олон улсын хэлэлцээрийг УИХ-аар соёрхон батлуулдаг хуультай. Энэ бол хоёр улсын хооронд хийгдэж байгаа томоохон хэлэлцээр. Дотроо гурван төрлийн дагалдах компани хоорондын гэрээ явна. Нэгдүгээрт, төмөр замын хил холболтын асуудал, хоёрт, нүүрс худалдах, худалдан авах урт хугацааны гэрээ, гуравт уурхайн хүчин чадлыг нэмэгдүүлэх.
УИХ-аар өмнө нь энэхүү хэлэлцээрийг батлуулахад баримтлах үндсэн чиглэлийг батлуулсан. УИХ-аар батлагдсан үндсэн чиглэлийн хүрээнд хэлэлцээрийг байгуулж чадсан.
АНУ ын баримталж байгаа бодлогоос болж олон улсын худалдаан дээр нэлээд асуудал үүсч байгаа. Гангийн хэрэгцээ буурч, нүүрсний үнэ унаж байгаа цаг үед энэхүү хэлэлцээрийн ач холбогдол илүү оршино гэж үзэж байгаа. Тухайлбал, өмнө борлуулж байсан нүүрсэн дээр нэмэлтээр таван сая тонн нүүрс борлуулна. Үүний үр дүнд 400 орчим сая ам.долларыг нүүрсний борлуулалтаас нэмж төвлөрүүлэх боломж бүрдэж байгаа.
Мөн 1955 оны хоёр улсын төмөр замын хил холболтоос хойш 70 жилийн дараа хийгдэж байгаа хоёр дахь хил холболтын төмөр зам. Гашуунсухайт-Ганцмиод боомтоо төмөр замаар холбосны дараа Шиэвээ хүрэн-Сэхээ, Хангимандал, Бичигт, Зүүн хатавч, баруун зүүн коридороор төмөр замыг холбох гэсэн асуудлууд маш хурдтайгаар шат дараатайгаар хэрэгжинэ" гэлээ.
