Дани улс батлан хамгаалахын төсвөө нэмнэ гэсэн шийдвэрийг тус улсын Ерөнхий сайд Метте Фредериксен танилцууллаа. Тодруулбал Дани улс ирэх хоёр жилийн хугацаанд Батлан хамгаалахын төсвөө 50 тэрбум крон буюу долоон тэрбум ам.доллар болгож нэмсэн байна. Энэ нь Дани улсын ДНБ-ийн гурван хувьтай тэнцэж байна. Мөн өнгөрсөн хагас зуун жилийн хугацаанд анх удаа батлан хамгаалах салбарт ийм их хэмжээний төсөв байршуулахаар болж байна. Дани улс ийнхүү Батлан хамгаалахын төсвөө огцом нэмж байгаа нь ОХУ-ын аюул заналхийллээс үүдэлтэй гэж Ерөнхий сайд Фредериксен тайлбарлалаа. ОХУ Украинтай байлдаж эхэлснээс хойш Украиныг тасралтгүй дэмжиж байсан Европын улс орнуудын нэг нь Дани улс юм. Дани улс 2022 оны хоёрдугаар сард Орос, Украины дайн эхэлснээс хойш Украин улсад 7,5 тэрбум ам.долларын цэрэг армийн тусламж үзүүлсэн байна. Мөн иргэдийн зүгээс 741 сая ам.долларын хандив тусламжийг Украины ард иргэдэд үзүүлжээ.

Ерөнхий сайдын хэлснээр “Бид батлан хамгаалахаа хүчирхэгжүүлэхийн тулд худалдан авалт хийх хэрэгтэй байна. Бид дараагийн шинэ үеийн тоног төхөөрөмжөөр тоноглох зайлшгүй шаардлагатай. Хэрвээ бид цаг хугацаа алдвал илүү урт хугацаанд том алдаа хийнэ. Тиймээс аль болох түргэн сонголтоо хийх ёстой” гэсэн байна. Түүнчлэн бодит байдал дээр Оросын аюул заналхийлэл ойрхон байгаа бөгөөд Оросын эзэнт гүрний мөрөөдөл зөвхөн Украинаар тогтохгүй, бүх Европыг заналхийлж байна гэж Ерөнхий сайд Фредериксон сэрэмжлүүлэв.

Энэ долоо хоногийн даваа гарагт Парист Европын орнууд Украины асуудлаар шуурхай хуралдаан хийсэн. АНУ-ын Ерөнхийлөгчөөр Доналд Трамп сонгогдсонтой холбогдуулж Вашингтон Украины дайны асуудлыг шийдвэрлэхэд баримталж буй бодлогоо өөрчлөх болсон. Даваа гарагт хийсэн уулзалтын дараахан Данийн Ерөнхий сайд ийнхүү батлан хамгаалахын төсвөө огцом нэмэх шийдвэрийг танилцууллаа. Ерөнхийлөгч Трамп Орос, Украины хооронд гал зогсоох хэлэлцээр байгуулахаар яаравчилж байгаа нь ОХУ-ын армийг хүчээ сэлбэх, Украинаас өөр Европын улс руу цэргээ татаж дайны бэлтгэл хийх боломжийг Кремльд олгоно гэж Данийн Ерөнхий сайд үзэж байна.

Трамп Цагаан ордонд дахин ирснийхээ дараа НАТО-ын холбоотнууддаа батлан хамгаалахын төсвөө нэмж ДНБ-ийнхээ тав хүртэл хувьтай тэнцүүлэхийг шаардаад байгаа юм. АНУ-ын батлан хамгаалахын төсөв нь ДНБ-ийнх нь 3,4 хувьтай дүйцдэг байна.