Өнгөрсөн оны зун ОХУ-ын Ерөнхийлөгч Владимир Путиныг Пёньянд айлчлах үеэр хоёр улсын аюулгүй байдал, батлан хамгаалахын салбарт байгуулсан хамтын ажиллагаа, түншлэлийн хүрээнд Умард Солонгосын цэргүүд Украины дайнд байлдаж байна гэж өрнөдийнхөн болоод Өмнөд Солонгосын талаас мэдээллээд байгаа юм. Украин, АНУ, Өмнөд Солонгосын эх сурвалжууд ОХУ-ын Курск мужийн дайнд Умард Солонгосын 10,000 гаруй цэрэг Киевийн эсрэг байлдаж байгаа тухай оны өмнөөс мэдээлж эхэлсэн. Украины Ерөнхийлөгч Володимир Зеленський өчигдөр дайны талбараас Умард Солонгосын хоёр цэргийг олзолсон тухай мэдээлсэн. Умард Солонгосын олзны хоёр цэргийг ОХУ-д олзлогдсон Украины цэргүүдээр солино гэдгээ Зеленський хэлсэн байна.

Тэгвэл өнөөдөр Өмнөд Солонгосын Үндэсний тагнуулын алба шинэ мэдээлэл өглөө. Тус албаны мэдээнд дурдсанаар УКраины дайнд Оросын талд байлдаж байгаа Умард Солонгосын 3,000 цэрэг амь нас, эрүүл мэндээрээ хохирсон гэжээ. Тодорхой хэлбэл Умард Солонгосын 300 цэрэг дайны талбард амь үрэгдэж, 2,700 цэрэг гэмтэж шархадсан гэж мэдээллээ. Өмнөд Солонгосын тагнуулын алба Умардын цэргүүд орчин үеийн дайны арга барил, тактикын тухай мэдээлэл дутмаг, ойлголтгүй байгаагаас олноороо хохирол амсаж байна гэжээ.

Кремлийн зүгээс Зеленськийн хийсэн Умард Солонгосын хоёр цэргийг олзолсон тухай болон Өмнөд Солонгосын тагнуулын албаны Умард Солонгосын 3,000 цэрэг хохирол амссан тухай мэдээллүүдийн аль алинд нь тодорхой хариулт өгөөгүй байна. Кремлийн хэвлэлийн төлөөлөгч Дмитрий Песков эдгээр мэдээлэл үнэн бодит эсэхийг бид батлахгүй гэсэн байр суурийг илэрхийлжээ.