Өчигдрөөс эхлэн зарим эцэг эхийн төлөөлөл папиллома вирусний эсрэг вакциныг хүүхдүүддээ хийлгэхгүй хэмээж буй. Мөн олон нийтийн сүлжээнд уг вакцин нь үргүй болгодог, алцгеймар өвчин үүсгэдэг гэх мэдээлэл цацагдаад буй. Тэгвэл үүнтэй холбогдуулан Эрүүл мэндийн яамнаас мэдээлэл хийлээ.

ХӨСҮТ-ийн захирал Н.Эрдэнэхүү "Монгол Улс хавдрын шалтгаант нас баралтаараа дэлхийд тэргүүлдэг. Тэр дотроо элэг, ходоод, умайн хүзүү, улайн хоолой, уушги зэрэг хавдраар тэргүүлж байна. Гэвч вирусний шалтгаант хавдар дэлхий дээр тэргүүлдэг улс орон өнөөдөр үлдээгүй. Харин бид бүхэн орчны нөлөөт шалтгаантай хавдраар нас барж байгаа эмгэнэлтэй дүр зурагтай байна. Тиймээс бид шинжлэх ухааны нотолгоонд суурилсан арга хэмжээ авах хэрэгтэй байна. Үүний нэг нь, өнгөрсөн хугацаанд Монгол Улсын эрүүл мэндийн салбарт ажиллаж байгаа эрдэмтэн, мэргэжилтнүүд зүтгэж, олон эсэргүүцлийг давж, хуулиар нь батлуулж, одоо товлолтод оруулж байгаа хүний папиллома вирусний дархлаажуулалт гэж бид үзэж байгаа. Улмаар олон хүн үүнийг талархан хүлээж авч байгаа гэж бодож байгаа. Дэлхийн улс орнууд умайн хүзүүний хавдаргүй гэдгээ зарлаж байгаа. Гэтэл бид дэлхийд тэргүүлээд, эхний таван хавдрын нэгдүгээрт бичигдэж байна. Өнөөдөр Монголд 4712 хүн умайн хүзүүний хавдраар оношлогдоод байна. Жилд 160 хүн нас барж, 400-500 гаруй хүн шинээр оношлогддог. Шинээр өвдөж байгаа хүмүүсийн гол шалтгаан нь, эрэгтэй, эмэгтэй бэлгийн замаар дамжин халдварлаж байгаа папиллома халдварын дамжилт. Үүнийг бууруулахын тулд умайн хүзүүний хавдрын эсрэг вакцин гаргасны эцэст олон улс орон хавдаргүй гэдгээ зарлаад байна. Тиймээс энэ вирусний эсрэг вакцин хийснээср энэ өвчлөлийн тархалт буурна. Дагаад нас баралт буурна гэсэн тооцоолол хийж байна. Өнгөрсөн хугацаанд энэ ажлыг хэрэгжүүлсэн, нийгмийн эрүүл мэндийн төлөө зүтгэсэн олон хүнд баярлалаа гэдгээ хэлье. Вакцин хийснээр хүүхэдгүй, хөгжлийн бэрхшээлтэй болгоно гэсэн судалгаа дэлхий дахинд байхгүй. Буруу мэдээлэл дахиад олон хүний амиар солигдоно" гэлээ.

АШУҮИС-ийн Био-Анагаахын сургуулийн Бичил амь судлал, халдварын сэргийлэлт, хяналтын тэнхимийн эрхлэгч АУ-ны доктор, дэд профессор Ч.Баттогтох "Вирус, бактери янз бүрийн өвчлөл үүсгэдэг. Гэхдээ зарим вируст онцгой чанар байдаг. Өөрөөр хэлбэл, зарим вирус хорт хавдар үүсгэх чадвартай байдаг. Хүний папиллома вирус нь хүн, амьтны дунд нэлээд тархалттай. Хүний папиллома вирусний 200 орчим хэв шинж байдаг. 50 орчим нь бэлгийн хавьтлаар дамждаг. Өөр нэг онцлог нь, вирусний хорт хавдар үүсгэх нөлөө нь хурдан илэрдэггүй. Хүний папиллома вирусний хамааралт хорт хавдрууд нь хамгийн том халдварын шалтгаант хорт хавдар юм. Түгээмэл тохиолддог нь умайн хүзүү. Гэхдээ ам залгиур, шулуун гэдэс зэрэг олон эрхтэнд хавдар үүсгэдэг. Хүний папиллома вирусний вакциныг анагаах ухаанд хорт хавдраас сэргийлэх боломжтой вакцин гэж үздэг. Энэ бол маш хурдацтай явагддаг. 2030 он гэхэд умайн хүзүүний хавдаргүй орон болно гээд зарим орон зарлаж байна.

ХӨСҮТ-ийн Дархлаажуулалтын албаны дарга О.Дашпагма "Монгол Улс дархлаажуулалтын хуультай. Одоогийн байдлаар 13 халдварт өвчний эсрэг есөн төрлийн вакцинаар товын дагуу бага насны хүүхдүүдийг дархлаажуулах арга хэмжээ зохион байгуулж байна. Мөн насанд хүрэгчид сайн дурын дархлаажуулалтын үндсэн дээр хамрагдах боломжтой байдаг. Өнгөрсөн хугацаанд хэд хэдэн халдварын үүсгэгчийн эсрэг вакцин хийснээр устгах, хяналтад авах нөхцөл бүрдсэн. Тухайлбал, 2000 оноос хойш халдварт саа өвчин бүртгэгдээгүй. Татран, хөхүүл ханиад гэхчлэн олон эрсдэлт халдварт өвчний үүсгэгчийн эсрэг вакцинаар сэргийлж байгаа. Хүний папиллома вирусний вакциныг дэлхийн 145 улс дархлаажуулалтын хөтөлбөртөө нэвтрүүлсэн байна. 75 улс нь хоёр хүйсэндээ хийж байгаа. 9-14 насыг зорилтот бүлэг болгон хийж байгаа. Энэ хүрээнд Монгол Улс 11 настай хүүхдүүдийг дархлаажуулж, сэргийлэх боломжтой гэж үзэж байгаа. Умайн хүзүүний хавдаргүй дэлхий болохын тулд ажиллаж байна. Дэлхийн дахинд хүний папиллома вирусний эсрэг гурван төрлийн вакцин үйлдвэрлэх зөвшөөрлийг гурван компани авсан байдаг. Тэдгээр компаниуд олон улсын шаардлага хангасан. АНУ, Белги, БНХАУ гэсэн гурван улсад үйлдвэрлэж байна. Бид АНУ-ын үйлдвэрлэгчийн дөрвөн центэй хэрэглэхээр НҮБ-ийн Хүүхдийн сангаар дамжуулан авсан. НҮБ-ийн Хүүхдийн сан үйлдвэрлэгчээс хэрэглэгч хүртэлх явцыг хянадаг" гэв.