Монгол Улсын гавьяат жүжигчин Норовын Баатар таалал төгсжээ. Н.Баатар нь 1936 онд Завхан аймгийн Алдархаан суманд төрсөн. 1952 онд Улаанбаатар хотын Урлагийн сургуулийг, 1962 онд ЗХУ-ын Пермь хотын Сонгодог бүжгийн дунд сургуулийг балетын жүжигчин мэргэжлээр суралцаж төгссөн. 1952 оноос Улсын хөгжимт драмын театр, Улсын дуурь бүжгийн эрдмийн театрт насны тэтгэвэрт гартлаа гоцлол бүжигчнээр ажилласан.

Бүтээсэн дүрүүд:

• Г.Жамъян “Манай нэгдлийнхэн” балетын хадланч залуу (1953)

• Б.Асафьев “Бахчисарайн оргилолт булаг” балетын Вацлав, Гирей хаан (1956)

• Р.Ярулин “Шурале” балетын анчин залуу Али Батыр (1958)

• С.Гончигсумлаа “Ганхуяг” балетын Ганхуяг, Мангас, түшмэл (1959)

• Н.Римский-Корсаков “Шехерезада” балетын Синдбад далайчин (1963)

• Ш.Гуно “Вальпургийн шөнө” балетын Вак (1963)

• Э.Чойдог “Шарилжин дундах цэцэг” балетын Ширүүнгарьд (1964)

• С.Гончигсумлаа “Хошуу наадам” балетын Хайдар (1965)

• А.Зорина “Сонгино хүү” балетын Нимбэг ноён (1965)

• Ц.Пуни “Эсмеральда” балетын офицер (1967)

• Б.Дамдинсүрэн “Нуурын домог” балетын Сүрэн тайж (1968)

• М.Равель “Болеро” балетын Америк хүн (1969)

• С.Гончигсумлаа “Найз залуус” балетын Дорлиг (1970)

• Б.Асафьев “Парисын дөл” Ордны жүжигчин залуу (1971)

• Л.Минкус “Дон Кихот” балетын бухтай тулалдагч (1971)

• Э.Чойдог “Хөгжмийн эгшиг” балетын Бялар (1973)

• Б.Дамдинсүрэн “Анчин ба согоо” балетын чоно (1973)

• Ж.Чулуун “Уран Хас” балетын Дүвчин лам, бар, хүүхэлдэй ноён (1974)

• А.Морозов “Ай Ёо доктор” балетын Дээрэмчин (1975)

• П.Чайковский “Хунт нуур” балетын Ротбарт (1975)

• “Испани бүжгийн цоморлиг”-ийн Франц залуу (1977)

Э.Чойдог “Мөнгөн залаа” балетын Мангасын хаан (1979) зэрэг үндэсний болон сонгодог балетын өвөрмөц олон дүрүүдийг уран чадварлаг бүтээжээ.

Москвагийн Их театр, Ленинградын Кировын нэрэмжит театрт ЗХУ-ын Ардын жүжигчин Л.Сахъянова, Н.Чистоков нарын алдарт бүжигчидтэй хослон бүжиглэж, Станиславский, Данченко-Немировичийн нэрэмжит театрууд, Румын, Югослав зэрэг олон орны театрын тайзнаа бүжиглэж Монголынхоо балетын урлагийг сурталчлахад оролцож явсан нэрт бүжигчин юм.

Тэрээр Монголын ард түмний хайртай “Тунгалаг Тамир” уран сайхны кинонд Эрдэнийн дүрийг уран чадварлаг бүтээсэн билээ.

Монголын балетын урлагийн нэрт жүжигчин Н.Баатарын уран бүтээл, хөдөлмөр зүтгэлийг нь төр засгаас өндөр үнэлж 1969 онд Монгол Улсын гавьяат жүжигчин цолоор шагнажээ.

Талийгаачийн гэгээн дүр, дэлгэц болон тайзнаа бүтээсэн дүрүүд, хүнлэг энэрэнгүй, ажилч хичээнгүй, төлөв даруу зан чанар нь Монгол хүн бүрийн сэтгэлд үүрд хадгалагдан үлдэх болно хэмээн  УДБЭТ-ын захиргаа, нийт хамт олноос эмгэнэл илэрхийлжээ.