“Автомашингүй өдөр-2024” арга хэмжээг энэ сарын 21-ний бямба гарагт зохион байгуулна. Зохион байгуулалтын талаарх мэдээллийг холбогдох албаныхан өглөө. Тус өдрийг дэлхийн 1500 орчим хот тэмдэглэдэг байна. Манай улс энэ өдрийг 12 дахь жилдээ зохион байгуулж байна. Тус арга хэмжээний гол зорилго нь автомашинаас татгалзахад олон нийтийг уриалах аж. Энэ өдрийн хувьд, төвийн байршилд авто замын хөдөлгөөнийг хязгаарлах бөгөөд зах, худалдааны төвүүд ажиллахгүй. Сүхбаатарын талбайд урлаг, спортын өдөрлөг зохион байгуулж иргэдэд эрүүл мэндийн тусламж, үйлчилгээ үзүүлэх асар барина.
07.00-18.00 цагийн хооронд дараах гудамж, авто замуудыг хаана. Үүнд:
- Д.Сүхбаатарын гудамж,
- Их сургуулийн гудамж,
- Сөүлийн гудамж,
- Партизаны гудамж,
- Бөмбөгөр худалдааны төвийн уулзвар,
- Төмөрчний гудамж,
- Гэсэр сүмийн уулзвар,
- Самбуугийн гудамж,
- Анкарагийн гудамж,
- Бага тойруу,
- Бээжингийн гудамж,
- Токиогийн гудамж,
- Залуучуудын гудамж,
- Зүүн дөрвөн замын уулзвараас Баруун дөрвөн замын уулзвар,
- Чагдаржавын гудамж,
- Элчингийн гудамж,
- Олимпийн гудамж,
- Гэндэнгийн гудамж,
Монголын хүүхдийн ордны уулзвараас Монгол шуудангийн уулзвар зэрэг байршлуудад автомашины хөдөлгөөнийг дээрх хугацаанд түр хязгаарлана. Мөн автомашингүй өдрөөр дээрх хаасан авто замуудад цахилгаан мотоцикл, цахилгаан дугуй, цахилгаан скүүтэр, суррон зэргийг хөдөлгөөнд оролцуулахгүй аж.