Испанийн Ерөнхий сайд Педро Санчес , Украины Ерөнхийлөгч Володимир Зеленский нар Мадрид хотноо уулзаж, батлан хамгаалах, аюулгүй байдлын салбарт хамтран ажиллах урт хугацааны гэрээ байгуулсны дараа Испани улс энэ онд Украинд нэг тэрбум еврогийн цэргийн тусламж үзүүлэхээ зарлалаа. Хэлэлцээрийн нарийн ширийн зүйлийг олон нийтэд зарлаагүй байгаа ч Испанийн засгийн газрын уг тусламж нь Украиныг агаарын довтолгооноос хамгаалах хүчин чадлаа нэмэгдүүлэхэд чиглэгдэх аж.
Украины зүүн хойд хэсэгт орших Харьков хотын худалдааны төв Оросын агаарын довтолгоонд өртөж 18 хүн амиа алдсанаас хойш хоёр хоногийн дараа Испани ийнхүү цэргийн тусламж үзүүлэхээ мэдэгдлээ.
Батлан хамгаалах салбарт хамтран ажиллах гэрээ байгуулсны дараа хэвлэлийн бага хурал дээр Ерөнхий сайд Санчес “Энэ гэрээ Украинд өөрийн батлан хамгаалах чадавхиа нэмэгдүүлэх, тэр дундаа энгийн иргэд, хотууд болон дэд бүтцээ агаарын довтолгооноос хамгаалах системийг сайжруулах боломж олгоно” гэж мэдэгдэв.
Испанийн Ерөнхий сайд мөн Украинд Патриот пуужин нийлүүлэхээ хэдийнэ амласан бөгөөд танк болон бусад сумны бусад багц илгээнэ гэж мэдэгдэв. Түүнчлэн уг гэрээнд цэрэг тагнуулын сургалт, дайны дараах сэргээн босголт, хүмүүнлэгийн тусламж зэргийг тусгажээ.