“Яг түүн шиг” шоуны гурав дахь дугаарын ялагч, “Номин Талст” хамтлагийн дуучин А.Хаянхярваатай ярилцлаа.

-“Яг түүн шиг” шоуны гурав дахь дугаарын ялагч болсонд нь баяр хүргэе.

-Баярлалаа.

-Энэ дугаарт өөрийгөө түрүүлнэ гэж бодож байсан уу?

-Надад дэлхийн алдартай сопрано хоолойт Монсеррат гэх эмэгтэй таарсан. “Яг түүн шиг” шоуны энэ дугаарт бүжигтэй, жүжиглэлт ихтэй гоё үзүүлбэрүүд их байсан учир өөрийгөө ялна гэж ерөөсөө бодоогүй. Учир нь, надад таарсан дуучин маань хөдөлгөөнгүй зогсож байгаад л дуулдаг хүн байсан. Намайг түрүүлнэ гэж хэн ч төсөөлөөгүй юм шиг байна лээ. Ялагч болсон хүний үзүүлбэрийг дахиулдаг дүрмийн дагуу дуулах гэтэл миний ард хөгжим тоглосон оркестрын хөгжимчид маань яваад өгчихсөн байсан (инээв).

-Таны энэ удаагийн үзүүлбэр олны өмнө дуурийн дуу дуулсан анхны тохиолдол биш байх. Ямар ч дуурийн дууг дуулж чадна гэсэн итгэл байдаг уу?

-Би СУИС-ийн сонгодог дууны анги төгссөн. Надад хоолойны сайн өгөгдөл байна. Миний хоолой дээш, доош дөрвөн октаванд дуугарч, олон төрөлд хувирч чаддаг. Ийм чадвар заяасан нь хосгүй завшаан, бурхны бэлэг байх.

-Өмнө нь энэ шоунд оролцохыг хүсдэг байсан уу?

-Миний хамгийн үзэх дуртай шоунуудын нэг байсан. 2022 онд хуулийн дагуу төрийн ажлаа өгсний дараа урлагийн салбартаа эргэж ирмээр санагдсан. Энэ жил телевизийн зүгээс мөн хөтлөгч Цоомоо маань санал тавихаар нь зориглоод орчихлоо. “Яг түүн шиг” шоу уран бүтээлч бидэнд их өгөөжтэй шоу юм байна. Нэг хүн 10 өөр хүний дүрд хувирч, дуу хоолой, биеийн хэлэмж, бүжиг, царай гээд бүгдийг нь дуурайна. Тэр хүний амьдралаар амьдрах нь холгүй бэлдэж оролцож байгаа. Үнэхээр чадвар чансаа шаардсан шоу юм байна. Телевизээр үзэх, яг өөрөө оролцох нь мэдээж өөр. Үзэгчдэд гоё шоу үзүүлэхийн тулд ард нь их том баг хамт олон ажиллаж байгаа. Нүүр хувиргалтын баг маань бас үнэхээр супер. Энэ завшааныг ашиглаад та нартаа баярлалаа гэж хэлье.

-“Энэ шоу оролцогчдодоо их өгөөжтэй” гэж та хэллээ. Таны хувьд яг ямар өгөөжтэй байна вэ?

-Би энэ шоунаас илүү шинэ түвшинд гарах ёстой, зөвхөн гоё хоолой гаргаад дуулах нь хангалтгүй юм байна гэдгийг мэдэрч байна. Тайзан дээр бүжиглэх жүжиглэхээс эхлээд шинэлэг, энтертайнмэнт үзүүлбэр үзүүлэх ёстой юм байна гэдгийг “Яг түүн шиг” шоунаас суралцаж байна.

-Таныг үүнээс цааш дахиад өөр, шинэ түвшинд гарна гэхээр хүмүүс яаж төсөөлөх бол?

-Энэ шоунд оролцохоос өмнө өөрөөсөө ийм чадвар гарна гэж төсөөлөөгүй. Өөрийнхөө дуулалт, тайзан дээр биеэ авч яваа байдлаа голдоггүй ч тайзны найруулагчтай, бүрэн хэмжээний шоунд оролцоод явахад өөрийгөө голж эхэлж байгаа. Дэлхийн шоу учраас дэлхийн одуудыг дуурайж, яаж хөдөлмөрлөдөг хэсгээс нь суралцаж байна. Хэдий долоохон хоног ч гэсэн дэлхийн уран бүтээлчид ямар их эрч хүч гаргаж, хөдөлмөрлөж байж хэдэн тэрбум хүний танил болдгийг ойлгож байгаа. Шинээр гарч ирж байгаа дүү нартаа захиж хэлэхэд, найруулгатай, тайзны тавилттай, жүжиглэлттэй, дуулалтаа сайжруулсан байдлаар уран бүтээл хийх цаг нь болсон байна. Хүмүүс Хаянаа яаж шинэчлэгдэж байгааг энэ шоунаас харах байх.

-Жил бүрийн “Яг түүн шиг” шоуны оролцогчид их дотно ах дүүс болдог шиг санагддаг. Танай хамт олны хувьд?

-Санамсаргүй байж байгаад ангийн дарга болчихсон (инээв). Манай ангийнхан дандаа бие биедээ урам өгдөг. Хичнээн хоорондоо өрсөлдөж байгаа ч нэгэндээ зөвлөгөө өгч, байнга дэмждэг.

-Та шоуны дараа шинэ уран бүтээл хийх үү?

-Хийнэ. Дууныхаа санааг олж авах их хэцүү байдаг. Дэлхий дээрх хэдэн тэрбум дуутай санаа болон аяыг нь давхцуулахгүйгээр сайн бодож төлөвлөх хэрэгтэй. Одоогийн байдлаар бүжиг, клипнийхээ талаар бодож байгаа.

-“Номин Талст” хамтлаг бүрэн бүрэлдэхүүнээрээ нэгдэж дуулах уу. Тоглолтоо хийгээсэй гэж боддог шүтэн бишрэгч олон байх.

-Хамтлагаараа нэгдэх боломж бүрдэж өгөхгүй байна. Бид 25 жилийн ойгоо төрийн албанд ажиллаж байгаад өнгөрөөчихсөн. Уг нь одоо 30 жилийн ой маань ойртож байна.