Засгийн газрын хуралдаанаар хэлэлцсэн асуудлуудын талаар Боловсрол, шинжлэх ухааны сайд Л.Энх-Амгалан мэдээлэл хийлээ. Тэрээр "Засгийн газрын хуралдаанд гурван ээлжээр хичээллэх хэмжээнд хүрсэн сургуулиудыг танилцуулж, хөрөнгө оруулалтын ажлыг эрчимжүүлэх тэмдэглэл гаргууллаа. Улсын хэмжээнд гурван ээлжинд шилжих эрсдэлтэй 47 сургууль бий. Эдгээр сургуулийн асуудлыг 2024 оны улсын төсөвт тусгаж хэрэгжүүлж эхэлсэн ч зарим ажил нэлээд удаашралтай байгаа тул нийслэлтэй хамтарч, зарим эрхийг нээж байгаа.Зарим томоохон орон сцц-ны хорооллууд сургуульгүй баригдсан байгаа. Тиймээс нийслэлийн удирдлага тухайн хорооллыг барьсан ААН-үүдтэй уулзалт хийж газар чөлөөлүүлж байгаа. Чөлөөлсөн газар дээр нь барилга барихаар энэ сард нийслэлийн төсөвт тодотгол хийнэ.
2024-2025 оны хичээлийн жилд гурван ээлжид шилжих эрсдэлтэй 14 сургууль бий. Үүнээс 10 сургуульд онцгой арга хэмжээ авч, хөрөнгө оруулалтыг эрчимжүүлэхэд БШУЯ болон Улаанбаатарын хотын захирагч хамтран ажиллах чиглэл авсан.
Гурван ээлжид шилжих эрсдэлтэй сургуулиудын тоог бууруулахаар 11 байршилд 5980 хүүхдийн суудалтай сургуулийн төсөл арга хэмжээг шинээр эхлүүлнэ. Мөн энэ онд нийтдээ 40350 хүүхдийн хүчин чадалтай 86 төсөл арга хэмжээг дуусгахаар боллоо.
Гурван ээлжээр хичээллэх эрсдэл үүсдэг шалтгаан нь жил бүр 75-80 мянган хүүхэд нэгдүгээр ангид элсэж байхад 30-35 мянган хүүхэд сургуулиа төгсдөг. Жилд 30-40 мянган хүүхдийн шинэ хэрэгцээ үүсдэг гэсэн үг. Ойрын 5-8 жилд энэ хэрэгцээ байх болно.
Иймээс сургуульгүй хороо, хороололд газар чөлөөлөх арга хэмжээг нийслэлтэй хамтарч хэрэгжүүлж байгаа. Өнгөрсөн жил зургаан сургуульд энэ арга хэмжээг авсан нь үр дүнгээ өгсөн..
2024 онд нийслэлд сургуулийн 12 барилга байгууламжийг ашиглалтад хүлээж авна.
