Өнгөрсөн сард Хятадын хамгийн алдартай шар айраг болох "Tsingtao" үйлдвэрийн соёолж хадгалах сав руу нэг хүн шээж байгаа бичлэг нийгмийн сүлжээгээр цацагдсан. Цагдаа нар дээрх хэрэг явдал “Tsingtao Brewery” компанийн Шаньдун мужийн Пиндү хот дахь салбарт болсныг олж тогтоожээ. Улмаар Куи овогт ажилчныг баривчлан саатуулаад байна. Тэрээр үйлдвэрт соёолж тээвэрлэж авчирсан ачааны машины жолоочтой маргалдсаны улмаас түүхий эд хадгалах сав руу шээсэн гэж мэдүүлжээ. Харин үйлдвэрийн зүгээс соёолж хадгалах сав тухайн үед хоосон байсан, мөн дээрх хэргийг өдүүлсэн хүн  "Tsingtao"-ийн үндсэн ажилтан бус туслан гүйцэтггэгч компанид харьяалагддаг хэмээн тайлбарлалаа. Цаашид ийм зөрчлөөс урьдчилан сэргийлэхийн тулд чанарын хяналтыг чангатгах, ажилчдын зан төлөвт тавих хяналтыг эрчимжүүлэх хэд хэдэн арга хэмжээ авсан гэжээ. Түүнчлэн хэрэг явдалд өртсөн байж болзошгүй бүх соёолжыг битүүмжилж, үйлдвэрлэлийн процессоос хасжээ.