Иракийн хойд хэсгийн Ниневех мужид болсон хуримын ёслолын үеэр гал гарсны улмаас 100 гаруй хүн амь үрэгдэж, 150 хүн шархадсан байна. Мягмар гарагийн орой Аль-Хамдания дүүрэгт болсон гэрлэх ёслолд олон зуун хүн оролцож байжээ.
Ослын шалтгааныг эцэслэн тогтоогоогүй байгаа ч салют буудуулсны дараа гал авалцсан гэж орон нутгийн телевиз мэдээллээ. Мөн амиа алдсан хүмүүсийн дунд хуримлагч хос байсан эсэх нь тодорхойгүй байна. Иракийн хэвлэл мэдээллийн хэрэгслээр тэднийг нас барсан гэж мэдээлсэн боловч Нина агентлаг хос хоёрыг галаас амьд гарж чадсан ч түлэгдэлтийн улмаас эмчлүүлж байгаа хэмээн дамжууллаа.
Барилгын шатамхай хавтангууд галын дэгдэлтэд нөлөөлж, таазны зарим хэсэг нь нурсан байж магадгүй хэмээн Иракийн засгийн газрын хэвлэл мэдээллийн INA агентлаг мэдээлэв. "Гал хэдхэн минутын дотор авалцсан нь амархан шатдаг, хямд барилгын материал хэрэглэсний нөлөө" гэж Иракийн иргэний хамгаалалтын газраас дүгнэжээ.
Гал сөнөөгчид лхагва гарагийн үүрээр амьд үлдэгсдийг хайхаар барилгын нуранги дээр ажиллаж байгааг Reuters агентлагийн сурвалжлагч дүрс бичлэгт буулгасан юм.
Ниневех мужийн амбан захирагчийн орлогч Хассан аль-Аллах нь Reuters агентлагт мэдээлэхдээ 113 хүн нас барсан нь батлагдсан гэжээ. Харин төрийн мэдээллийн INA агентлаг 100 гаруй хүн амиа алдаж, 150 хүн шархадсан тухай нийтэлсэн юм. Нас барсан хийгээд бэртэж гэмтсэн хүмүүсийн тоо эцэслэн тогтоогдоогүй тул хохирогсдын тоо цаашид өсөх магадлалтай аж.
Бэртэж гэмтсэн хүмүүст цусаа хандивлахаар Аль-Хамдания дүүргийн төв эмнэлэгт олон арван хүн цуглаад байна.
Г.Анхбаяр
