Их дээд сургуульд суралцаж буй нийт оюутнуудын 70 орчим хувь нь эмэгтэй оюутнууд байна. Гэвч эмэгтэйчүүдийн хөдөлмөр эрхлэлтийн байдал эрэгтэйчүүдтэй харьцуулахад арван хувиар бага үзүүлэлттэй байгаа юм. Энэ нь эмэгтэйчүүдэд хүүхдээ харангаа ажиллах боломж хязгаарлагдмал байгаатай холбоотой.
Түүнчлэн жендэрийн эрх тэгш байдлын бодлого, түүний үр нөлөө нь урт хугацааны үзүүлэлт байдаг. Нөгөө талаас бага насны хүүхэдтэй ээжүүд ажил хөдөлмөр эрхэлж чадахгүй байгаа нь жендэрийн мэдрэмжтэй ажиллахгүй байгаагийн илрэл юм. Хүүхдээ хараад гэртээ сууснаар ажиллах хүчнээс гадуур тооцогдож, цаашлаад орлогын эх үүсвэртэй болж чадахгүй байна. Зөвхөн хүүхдээ харж байгаа гэх шалтгаанаар 2017 онд 89000 эмэгтэй ажил эрхэлдэггүй байв. Харин энэ тоо 2020 онд 120000 болж өссөн байна.
“Монголын эмэгтэйчүүдийн хөдөлмөрийг дэмжих холбоо” ТББ-ын тэргүүн Ш.Ариунаа
"Дэлхийн нийт эдийн засгийн гуравны нэг орчим хувийг асрахуйн эдийн засаг эзэлдэг. Хэрвээ үүнийг үнэлж, ДНБ-д оруулж тооцох юм бол 16.8 хувиар өсөх боломжтой. Ихэнх улс орнууд эмэгтэйчүүдийн хөдөлмөр эрхлэлтийг хөнгөвчилсөн технологи, зайнаас ажиллах боломжийг бодлогоор дэмжиж байна. Эмэгтэйчүүдийг гэрт нь суулгаж, улсын төсвөөс 50000 мянган төгрөгийн тэтгэмж олгох уу эсвэл ажил хийх боломжийг нь бүрдүүлэх үү гэдэг чухал уу. Эмэгтэйчүүд хөдөлмөр эрхлэх боломж бүрдсэнээр улсын төсөвт татвар, нийгмийн даатгалын орлого оруулна. Энэ нь манай улсын эдийн засагт маш чухал нөлөөтэй. Ойролцоогоор таван тэрбум орчим төгрөгийн орлого оруулах боломжтой гэсэн тооцоолол бий"
Азийн хөгжлийн банкнаас "Ажиллах хүчин дэх эмэгтэйчүүд, эрэгтэйчүүдийн оролцоог ижил түвшинд хүргэснээр Монгол Улсын урт хугацааны эдийн засгийн өсөлтийг дэмжих нь" судалгааг хийжээ. Тус судалгаанд дурдсанаар Монголын хөдөлмөрийн насны эмэгтэйчүүдийн 51.5 хувь нь ажил хөдөлмөр эрхэлж байгааг 63.2 хувьд хүргэх боломжтой гэжээ. Ингэснээр 30 жилийн дотор ДНБ-ийг 16.1 хувиар өсгөх боломжтой гэсэн үг юм. Энэ нь эдийн засгийн үр өгөөжтэйгөөс гадна ардчиллын суурь зарчим болох тэнцвэртэй төлөөллийг хангахад бодит хувь нэмэр болно.
