Монголын зүрх судас, цээжний хөндийн мэс заслын нийгэмлэгийн ерөнхийлөгч Ш.Зоригоо Eagle телевизэд өгсөн ярилцлагыг хүргэж байна.

-Зүрх нь гэнэт хаагдсаны улмаас амиа алдсан гэх харамсалтай мэдээ их дуулдах боллоо. Үүнд ямар нэгэн нөлөөлөл, нөлөөлж буй хүчин зүйл байгаа юу?

-Зүрхний өвчлөл нь дотроо шигдээс, судасны нарийсал, хавхалга гээд олон янз бий. Үүн дотроо зүрх гэнэт зогсох нь ихэвчлэн шигдээстэй холбоотой байдаг. Удаагаар нь янз бүрийн өвчнүүд, эмчлүүлээгүй төрөлхийн гажиг ордог. Ер нь зүрхний өвчлөлийг эмчлүүлээгүй удаан хугацаа өнгөрөөснөөс болж  гэнэт зогсох тохиолдлууд бий. Гэнэт зогсох нь олон янзын шалтгаантай. Ерөнхийдөө зүрх судасны өвчин нь өвчлөлөөрөө, нас баралтаараа дэлхийд тэргүүлж байна. Монголд ч ялгаа байхгүй.

-Зүрхний өвчин залуужиж байна гэх мэдээлэл бий. Өвчин залуужиж байна гэдэг нь юу гэсэн үг вэ. Ер нь зүрх юунаас болж өвддөг вэ?

-Өмнө нь зүрхний өвчлөл 50-аас дээш насныхан их өвчилдөг байсан бол одоо 25, 26, 30 орчим настай залуус зүрхний шигдээсээр их өвчилж байна. Зүрхний өвчин нь олон зүйлээс шалтгаалдаг. Сахрын өвчин, өөх тостой хоол их идэх, стресстэй байх, нойргүйдэл, утаа, тамхи зэрэг шалтгаан нөхцөлүүдээс хамаарч  зүрхний судасны хатуурал явагдаж байдаг. Улмаар хатуурал нь бөглөрөл болж амиа алдах тохиолдол гардаг. Харамсалтай нь хүний зүрхэнд утаа тамхинаас дутахааргүй сөрөг нөлөө үзүүлж байна. Генетикийн судалгаа хийвэл өөрчлөлттэй байх боломжтой гэж харж байгаа.

-Зүрхний олон төрлийн өвчлөлөөс манай улсад эмчлэгдэх боломжгүй өвчлөл бий юу ?

-Арваад жилийн өмнө 30 гаруй өвчнийг Монголд эмчлэгдэх боломжгүй гэсэн жагсаалт гарсан. Харин одоо бол эмчлэгдэх боломжгүй 26 өвчин байгаа гэж үздэг. Эдгээр өвчин дотор зүрх судасны таван өвчин бий. Уг таван өвчин эмчлэгдэхэд хэцүү. Тайлбарлавал, хоёр, гурваас дээш төрөлхийн зүрхний гажгууд хавсарсан. Мөн гол судас нь гэнэт урагдсан. Түүнчлэн зүрх нь гүйцэт агшиж чадахаа байсан, хагалгаанд ороод даахгүй түвшинд хүрсэн гэдэг ч юм уу. Иймэрхүү нөхцөл байдалтай маш хүнд таван өвчин бий. Уг өвчнүүдээс төрөлхийн гажиг, агшилт муудсан, гол судасны гажгуудыг бол Монголд эмчлээд эхэлсэн.

-Хүүхдүүд дунд зүрхний гажиг хэр байдаг вэ?

-Хүүхдүүд дунд зүрхний гажиг нэлээдгүй байна. Сүүлийн хоёр жилийн хугацаанд 900 гаруй нээлттэй буюу судас дотуурх мэс засал хийсэн. Гажгуудыг засах, цоорхойг бөглөх зэрэг мэс засал хийж байгаа. Харамсалтай нь хөдөө орон нутагт байдаг, эмнэлэг рүүгээ очиж чаддаггүй, оношлогдож чаддаггүй, өвчнөө хүндрүүлсэн зэрэг нөхцөл байдлаас болж хүүхдүүд мэс засалд оройтож орох тохиолдол бий. Энэ тохиолдолд мэс засал нь хүнд болдог. Хэдийгээр хүүхдийн зүрхний төрөлхийн гажгийг эрт илрүүлэх оношилгоо нийслэлд сайн байгаа ч хөдөө орон нутагт дутагдалтай байна. Иймд орон нутгийн эмч нарыг чадавхжуулах, шаардлагатай тоног төхөөрөмжийг илгээх хэрэгтэй байгаа юм.