Шатахууны хязгаарлалттай холбоотой асуудлаар Уул уурхай хүнд үйлдвэрийн яамны газрын дарга Н.Анхбаяр мэдээлэл өглөө. Тэрээр "Өнгөрсөн долоо хоногийн баасан гарагт ОХУ-ын Засгийн газраас үнийн өсөлтийн эсрэг хэрэгжүүлж буй арга хэмжээний хүрээнд газрын тосны зарим нэг бүтээгдэхүүн болон шатахууны экспортыг тодорхой хугацаагаар хязгаарласан. Үүнтэй холбогдуулан Монгол Улсад импортоор ирэх шатахуун тодорхой гаалийн кодоор хязгаарлалтад орсон юм. Энэ үеэр ОХУ-ын Холбооны хурлын төрийн Думын дарга В.В.Володин тус тогтоолоор Монгол Улс хязгаарлалтад орохгүй гэсэн мэдээллийг өгсөн.
Уул уурхай хүнд үйлдвэрийн яамнаас цаашид хэрэгжүүлэх арга хэмжээг боловсруулан ажиллаж байна. Шатахууныг хэвийн импортлох асуудлаар ОХУ-ын Эрчим хүчний яам руу албан захидал хүргүүлнэ. Монгол Улсад шатахууны нөөцийг таслахгүй байх тал дээр анхаарч ажиллана. Одоогоор шатахууны нөөц хэвийн байгаа бөгөөд А92 бензин 30 хоногоос дээш, дизель түлш 40 орчим хоногийн нөөцтэй байна" гэлээ.
