Согтуугаар тээврийн хэрэгсэл жолоодвол эрүүгийн хариуцлагад татдаг болох тухай асуудлаар ХЗДХЯ-ны Төрийн нарийн бичгийн дарга П.Сайнзориг мэдээллээ.
Тэрээр "Согтуугаар тээврийн хэрэгсэл жолоодсон этгээдэд эрүүгийн хариуцлага ногдуулах хуулийн төслийг боловсруулж, УИХ-д өргөн барих гэж байна. Уг хуулийн төслийг намрын чуулганаар өргөн барина. Ойрын өдрүүдэд гэлтгүй өнгөрсөн хугацаанд ч тэр хувь хүний хариуцлагагүй байдлаас үүдэж, зам тээврийн ослоор амиа алдсан тохиолдол их гарч байна. Жилд дунджаар согтуугаар гэмт хэрэг үйлдсэн 33000 орчим зөрчил бүртгэгддэг. Эдгээрт зөрчлийн тухай хуулийн дагуу арга хэмжээ авдаг.
Хууль бус үйлдлийг бага дээр нь таслан зогсоох үүднээс арга хэмжээ авч ажиллаж байгаа. Тухайлбал, хулгайн гэмт хэргийг цаашид хохирлын хэмжээ заагдахгүйгээр хэлбэрийн бүрэлдэхүүнтэй болгох асуудлыг хөндсөн. Гэтэл нийгмийн олонхын зүгээс наймхан ишиг гэх мэтээр хулгайн гэмт хэргийг өөгшүүлэх хандлага ажиглагдаж байна. Мөн торгууль шийтгэлийн орлогоор улсын төсөв бүрдүүлэх гэж буй мэтээр ойлгодог. Гэвч эдгээр гэмт хэргүүдэд зайлшгүй хариуцлага тооцдог байх хэрэгтэй.
Энэ оны эхний байдлаар л гэхэд 37 хүүхэд зам тээврийн улмаас амь насаа алдсан байна. Түүнчлэн өнгөрсөн онд 123 хүн ослын улмаас амиа алдсан. Эдгээр статистик тоон мэдээлэл замын хөдөлгөөний соёл, ухамсар хэр хэмжээнд байна вэ гэдгийг харуулж буй. Жил бүр 100-аас дээш тооны хүн согтуу жолоочийн улмаас амиа алдаж байна. Энэ шударга бус байдалтай нийгмээрээ тэмцмээр байна.
Согтуугаар тээврийн хэрэгсэл жолоодно гэдэг санаатай үйлдэл. Ийм хариуцлагагүй үйлдэл гаргаж байгаа хүмүүст ялын хариуцлагыг чангатгахаас өөр алга байна. Одоогийн мөрдөгдөж буй Зөрчлийн тухай хуульд зааснаар согтууруулах ундаа хэрэглэсэн үедээ автомашин жолоодсон бол тээврийн хэрэгсэл жолоодох эрхийг нэг жилийн хугацаагаар хасаж, 400000 төгрөгөөр торгодог. Харин тээврийн хэрэгсэл жолоодох эрхгүй, эсвэл жолоодох эрх нь дууссан хүн согтууруулах ундаа хэрэглэсэн үедээ автомашин барьсан бол албадан сургалтад хамруулж, 7-30 хоногийн хугацаагаар баривчлах шийтгэл оногдуулж буй" хэмээлээ.
