Хичээлийн шинэ жил эхэлж, нийслэлийн замын хөдөлгөөний ачаалал нэмэгдсэнтэй холбоотойгоор хөдөлгөөнд оролцох тээврийн хэрэгслийг улсын дугаараар нь хязгаарлах шийдвэрийг хотын удирдлагууд гаргасан. Улмаар иргэд наймдугаар сарын 26-наас эхлэн улсын дугаараас шалтгаалан замын хөдөлгөөнд ээлжлэн оролцож буй. Энэ шийдвэр 20 хоног үргэлжилнэ.
Тэгвэл өчигдрөөс тус шийдвэрийг илүү урт хугацаанд үргэлжлүүлэх нь түгжрэлийг сааруулах нэг гарц гэх агуулгатай жиргээ нийгмийн сүлжээнд цацагдаж эхлэв. Түүнчлэн автомашины дугаарын хязгаарлалт нь замын хөдөлгөөний ачааллыг эрс бууруулж буй иргэдэд ээлтэй шийдвэр гэх мэдээллийг хэвлэлүүд ч нийтлэх боллоо. Эндээс, цаашид ч автомашины дугаарын хязгаарлалт үргэлжилж болзошгүй гэх хардлага төрж буй.
Одоогоос нэг жилийн мөн л хичээлийн шинэ жил эхэлж буйтай холбоотойгоор наймдугаар дугаар сарын 27-ноос есдүгээр сарын 03-ны өдрийн хооронд тээврийн хэрэгслийн улсын дугаарын тэгш, сондгойгоор ангилж хөдөлгөөнд оролцуулж байсан. Улмаар тус шийдвэрийг үргэлжлүүлэх тухай асуудал эрх баригчдын түвшинд яригдаж байв.
Мөн үеэр төрийн шийдвэрлэх алба хаагчдын олон нь тэгш сондгойгоор явуулах нь нэг удаагийн аргацаасан шийдэл гэх байр суурь илэрхийлж байсан бөгөөд түгжрэлийг урт хугацаанд үр дүнгээ гаргалгаар шийдвэрлэх нь зүй гэцгээж байв.
ХЗДХ-ийн сайд Х.Нямбаатар: Түгжрэл гэдэг зөвхөн импортын машиныг хориглох, дугаарын хязгаарлалт хийгээд шийдэгдэх асуудал биш. Өнөөдөр Улаанбаатар хотын хөдөлгөөнд 600-615 мянган машин ороод ямар байгааг бүгд мэдэж байгаа. Тэгэхээр түгжрэл бууруулна гэдэг олон ажлын нийлбэр байх ёстой.
НИХТөлөөлөгч Б.Сэргэлэнбаатар: Бүтэн жилийн хугацаанд тэгш, сондгойгоор явуулах юм бол ялгаа байхгүй автомашины импортын тоо хоёр дахин нэмэгдэнэ. Магадгүй хоёр гурван жилийн дараа тэгш, сондгойгоор явуулсан ч, явуулаагүй ч ялгаа байхгүй тэг зогсолт хийнэ.
Энэ мэт эсэргүүцэлтэй тулгарсан тул дугаарын хязгаарлалтын шийдвэрийг товлосон хугацаандаа цуцалж байв.
Харамсалтай нь, жилийн дараа ч түгжрэлийн асуудалд ахиц гарсангүй. Харин ч сахил хүртээл шал дордов гэгчээр, дугаар хязгаарлах хоног, хугацаа нь уртсаж, цаашид үргэлжлүүлж болзошгүй дээрээ тулчихаад байна.
Түгжрэл бууруулахаар улсын болоод нийслэлийн төсвөөс багагүй мөнгө зарцуулж, түгжрэл хариуцсан сайдтай хүртэл болсон. Гэсэн ч түгжрэлийг сийрүүлэх эцсийн шийдэл нь иргэдийн замын хөдөлгөөнд оролцох эрхийг хязгаарлах явдал байгаа нь халаглах багадахаар асуудал.
Цаашлаад, дугаарын хязгаарлалтыг урт хугацаанд үргэлжлүүлэх нь тээврийн хэрэгслийн тоог нэмэх эрсдэлтэй бөгөөд хүний эрхийг хахиж, хавчсан шийдвэр юм. Хувиараа такси үйлчилгээнд явдаг, хүргэлтийн ажил хийдэг зэрэг тээврийн хэрэгслээрээ амьжиргаагаа заргуулдаг хүмүүсийн хоногийн хоолноос хумсалж буйтай агаар нэг. Эдгээрээс гадна, дугаар хязгаарласан өдрүүдэд нийтийн тээврийн багтаамж хэтийдэж, хүртээмж чамлагдаж буй. Мөн автомашины дугаарын хязгаарлалт үйлчилж буй бүсэд л түгжрэл өмнөхөөс багассан. Харин хотын захаар иргэд зам дээр "таг гацсаар" байна. Тиймээс эл шийдвэрийг "Дарга нарт зориулсан шийдэл" гэх шүүмжлэл ч нийгмийн сүлжээнд өрнөөд байгаа юм.
Асуудлыг углуургаар нь шийдвэрлэхгүй энэ мэт аргацаасаар байвал жил бүхний намрыг түгжрэл гэх "толгойн өвчинтэй" угтсаар байх нь.