Ням гарагт Варшав хотын төвд болсон засгийн газрын эсрэг жагсаалыг сөрөг хүчний Иргэний платформ намаас зохион байгуулжээ. Тэд ардчиллын хэм хэмжээг алдагдуулж, автократ дэглэмд шилжихийг санаархаж буй Засгийн газрын бодлогыг эсэргүүцэн жагссан юм.

2015 оноос засгийн эрхийг барьж буй Хууль, шударга ёсны нам ардчиллын хэм хэмжээг алдагдуулж, бие даасан шүүх засаглалд халдан, ЛГБТК+ нийгэмлэг болон нөхөн үржихүйн эрхийн эсрэг кампанит ажил эхлүүлсэн хэмээн сөрөг хүчний зүгээс байнга шүүмжилдэг.  Улмаар ирэх намар болох парламентын сонгуулийг Польшийн ардчиллыг аврах сүүлчийн боломж хэмээн анхааруулж байна.

1989 онд Польшийн коммунист дэглэмийг түлхэн унагахад гол үүрэг гүйцэтгэсэн Ерөнхийлөгч асан Лех Валенса, Ерөнхий сайд болон Евро комиссын ерөнхийлөгч асан Дональд Туск  зэрэг нэр нөлөө бүхий эрхмүүд ням гарагийн жагсаалд нэгдэж, барууны популист засгийн газрын эсрэг ардчиллын төлөө тэмцэхийг уриаллаа.

Ерөнхий сайд асан Дональд Туск "Бид 30, 40 жилийн өмнөх шигээ ардчилал, эрх чөлөөний төлөө дахин тэмцэхэд бэлэн байгааг  бүх Европ, дэлхий нийт харж байна" гэв.

Нийслэл Варшаваас гадна Краков тэргүүтэй томоохон хотуудад мөн иргэд эсэргүүцлээ илэрхийлж жагсжээ.