Queen хамтлагийн хамгийн алдартай уран бүтээлүүдийн дунд 6 минутын турш үргэлжлэх “Bohemian Rhapsody” дуу зүй ёсоор багтдаг билээ. Хамтлагийн уг дуугаар нэрлэсэн кино 2018 онд Холливудад бүтээгдсэнээр орчин цагийн урлаг сонирхогчдын чихэнд энэ нэр бүр ч хоногшсон нь лавтай.

Тэгвэл Queen хамтлагийн дуучин Фредди Меркюри “Bohemian Rhapsody” дуугаа бичихдээ анх “Mongolian Rhapsody” гэж нэрлэж байсныг гэрчлэх баримт дэлгэгдсэн байна. Тэртээ 1970-аад онд Меркюригийн дууны үг бичсэн 15 хуудас бүхий гар бичмэл дээр нэрийг нь анх “Mongolian Rhapsody” гэж бичсэн байснаа үзгээрээ баллаж  “Bohemian Rhapsody” болгон өөрчилсөн байжээ.

Уг гар бичмэлийг хэд дахин өөрчилж, дахин шинэчилсэн ул мөр үлдсэн байна. Тухайлбал дууны дахилт “Mama, just killed a man” гэж эхэлдэг боловч анхны гар бичмэл дээр “Mama, there is a war began” хэмээн тэмдэглэсэн байх ажээ.

Энэ мэтчилэн домогт Фредди Меркюригийн 1,500 эд зүйлийг Лондон дахь Sotheby’s дуудлага худалдаагаар зарахаар зэхэж байна. Ирэх есдүгээр сард болох дуудлага худалдаагаар дээрх эд зүйлс 800,000 фунт стерлингээс 1,2 сая фунт стерлинг хүртэл үнэд хүрнэ гэж зохион байгуулагчид хүлээж байна.