Засгийн газраас боловсруулсан Үндсэн хуульд өөрчлөлт оруулах тухай хуулийн төслийг өнөөдөр УИХ-д өргөн барихаар төлөвлөөд буй. Үндсэн хуульд өөрчлөлт оруулах гэж буйтай холбоотойгоор УИХ-ын сонгуулийг ирэх намар буюу аравдугаар сард зохион байгуулна гэх асуудал хөндөөгдөөд байсан юм. Тэгвэл энэ асуудлыг Засгийн газрын хуралдааны үеэр Ерөнхий сайд эсэргүүцсэн байна. Тэрээр УИХ-ын сонгууль хугацаандаа болно гэдгийг протоколд тэмдэглүүлэхийг хүссэн талаар Засгийн газрын хэвлэлийн албанаас мэдээллээ.

Өнгөрөгч гуравдугаар сард зохион байгуулагдсан Шилэн нам эрдэм шинжилгээ, онол практикийн хурлын үеэр сонгууль энэ оны аравдугаар сард болох эсэхийг Ерөнхий сайд Л.Оюун-Эрдэнээс тодруулахад "Үндсэн хуульд нэмэлт өөрчлөлт хийж, сонгуулийн холимог тогтолцоонд шилжиж, сонгуулийг зайлшгүй намар хийх нь зүйтэй гэвэл бид татгалзахгүй. Үндсэн хуульд нэмэлт өөрчлөлт орохгүй бол хуулиараа энэ боломжгүй. Нөгөө талаар улс төрийн намуудад сонгуульд бэлтгэх хугацаа өгөх хэрэгтэй. Гэхдээ сонгууль товлосон цагтаа болж, цагтаа болсон сонгуульд хууль эрх зүйн хувьд хэрхэн эрх тэгш бэлдэх вэ гэдэг нь зөв байж магадгүй” гэсэн байр суурь илэрхийлж байсан юм.