“Бүрэн зураглал” нэвтрүүлгийн ээлжит зочин редактороор УИХ-ын гишүүн Х.Баттулга ажилласан. Тэрээр улс төр, эдийн засгийн, нийгмийн хөгжлийн асуудлаар олон сонирхолтой зочид урьж, ярилцсан билээ. Тэгвэл УИХ-ын гишүүн Х.Баттулгын редактораар ажилласан "Бүрэн зураглал" хөтөлбөрийн онцлох эшлэлүүдийг хүргэж байна.

ШИНЭ ТӨМӨР ЗАМ, САЙНШАНДЫН АЖ ҮЙЛДВЭРИЙН ЦОГЦОЛБОРЫН ТАЛААР

УИХ-ын даргын зөвлөх А.Гансүх:

-Бид энэ төмөр замын асуудлыг ил болгоогүй бол хэн ч мэдэхгүй, дараад л өнгөрөх байсан. Бид энэ асуудлыг ил болгосон болохоор олон түмэн яриад байгаа юм.

-Та нар буруу ойлгоод байна. 200 сая долларыг нь хуваагаад идэж уугаад долоон сая нь хаана байна вэ гээд байна. Үгүй. Тэр мөнгө чинь банкиндаа байгаа.

УИХ-ын гишүүн Х.Баттулга:

- Дэлхий дээр анх удаа би бараг өөрийнхөө намын Ерөнхий сайдыг битгий сонгоорой гэж зарласан хүн байх.

-Та Ерөнхийлөгчид нэр дэвших үү ? -Намайг дэвшүүлэхгүй байх.

-Би хийгээгүй байхад энэ хийдэг юу юм бэ гэдэг бүлэглэл байна.

-Баригдсан төмөр замыг яагаад өөрийнхөө нүдээр очиж үзэж болдоггүй юм бэ.

-Бид бүтээн байгуулалт хийж үзээгүй болохоор энэ нь бидэнд эмгэг байна. Хийе гэхээр бүтэхгүй гэж боддог.

-Энэ бүхний шалтгаан ерөөсөө л сонгууль. "Судалгаагаар энэ “дурак”-ын нэр хүнд нь эхний гуравт яваад байх юм. Дарж авахгүй бол энэ гар чинь гарч ирээд “Нүүрстэй нам”-ын бодлогыг эвдэх гээд байна шүү дээ" гэж бодож байгаа.

-Монгол улсыг хөгжүүлэх бүх боломж надад байна. Баг хамт олон надад байна.

ТҮҮХИЙН ХЭЛХЭЭ СЭДВИЙН ХҮРЭЭНД

ШУА-ийн Түүх, археологийн хүрээлэнгийн захирал С.Чулуун:

-Түүх бол өөрийгөө үнэлэх үнэлэмж. Манай улсын түүхэнд үзээд өгье гэсэн ч алдаагүй нэг л хүн байдаг. Тэр бол А.Амар гуай юм. А.Амар гуай хүн төрийн зүтгэлтэн ямар байхыг өөрийн биеэр үлгэрлэж харуулсан хүн.

-Японд инженэрээр ажиллах хүнээс дэлхийн түүхийн шалгалт авдаг.

-Одоо ядаж төрийн албанд ажиллах гэж байгаа хүнээс түүхийн шалгалт аваасай.

-Бид өөрийн үндсэн зарчмаа хадгалахгүй, бусдыг дууриах юм бол 50-60 жилийн дараа түүхгүй болно.

-Манай улсын Үндэсний аюулгүй байдлын тунхаглалд Монгол улсын үндэсний дархлаа бол түүх соёл гэж бичсэн байдаг.

Түүхийн ухааны доктор Т.Лхагва:

-Орос, Хятад хоёрын хувьд манай улсын мөнхийн хөршүүд. Бид Европыг дагаад, Оросыг дагаад аз жаргалд хүрнэ гэж байхгүй. Хөгжилд тэмүүлж байгаа ч суурь чадвараа авч үлдэх ёстой.

УИХ-ын гишүүн Х.Баттулга:

-Цаашид ямар чиглэлд хэрхэн хөгжих вэ гэдгийг зөв тодорхойлж чадвал Монгол Улс 10 жилийн дотор Азидаа тэргүүлж чадна.

ХӨДӨӨ АЖ АХУЙН САЛБАРЫН ХӨГЖЛИЙН ТАЛААР

Загвар зохион бүтээгч Ариунаа сури:

-Бид Made in China, Made In india  шиг болж болохгүй. Made in Italy шиг брэндтэй болохын талд ажиллах хэрэгтэй.

АЖ ҮЙЛДВЭРИЙН ПАРК БА ЭДИЙН ЗАСГИЙН АЧ ХОЛБОГДЛЫН ТАЛААР

“Монголросцветмент” ХХК-ийн ерөнхий захирал Д.Ганболд:

-Гадныхан биднийг “Консервныхоо лаазыг хийж чадахгүй байж, коммунизм байгуулна гэж юу байдаг юм" хэмээн шоолдог.

-Ганц ч түүхий эдгүй БНСУ үйлдвэржилтээрээ тэргүүлж байхад бүх түүхий эд нь байгаа манай улсад ган, төмрийн үйлдвэр ч алга байна.