Солонгосын телевизийн олон ангит уран сайхны кинонд эмэгтэй дүрийг гол дүрийн баатар болгох үзэгдэл сүүлийн жилүүдэд эрс нэмэгджээ. Ингэхдээ эмэгтэйчүүдийг эрх мэдэлтэй, чадварлаг, өндөр албан тушаалтны дүрээр дүрслэх болсон юм.

Өнгөрсөн онд хамгийн их амжилт олсон Өмнөд Солонгосын телевизийн цуврал кинонуудын нэг болох “Ер бусын өмгөөлөгч Ву” (Extraordinary Attorney Woo) кинонд Солонгосын томоохон хуулийн фирмд ажилд орсон аутизмтай залуухан өмгөөлөгч эмэгтэй Ён Вугийн тухай өгүүлдэг.

Netflix-д тавигдсан даруйдаа нэг сар хүрэхгүй хугацаанд гадаад  хэл дээрх шилдэг арван цувралын нэг болсон тус кино нь өдгөө энэ жагсаалтын зургаадугаар байрт бичигдэж байна. Түүнчлэн саяхан 2023 оны шүүмжлэгчдийн сонголтын шагналд нэр дэвшсэн. Энэ нь Солонгос кинонд эмэгтэй гол дүр чухал байр суурь эзлэн амжилт олж байгаагийн тод жишээ болжээ.

Өмнөд Солонгосын үндэсний KBS телевизийн судалгаанаас харахад 2021 онд тус телевизийн олон ангит киноны гол дүрүүдийн 53 хувь нь эмэгтэй байсан нь өмнөх таван жилийн дундаж 49.8 хувьтай харьцуулахад өссөн үзүүлэлт юм. 2022 онд дэлгэцнээ гарсан “Under the Queen’s umbrella” киноны цэцэн хатан, “Little women” киноны тууштай сэтгүүлч, “Our Blues” киноны эмэгтэй гол дүрүүдийг жишээ болгон дурдаж болно.

Түүнчлэн ахлах сургуулийн жирэмсэн сурагч аавынхаа эсэргүүцлийг үл харгалзан хүүхдээ төрүүлж, коллежид сурч байгааг харуулсан кинонд залуу охидыг шийдвэр гаргах зоримог байдалтайгаар дүрсэлжээ. Гэвч бодит амьдрал дээр Өмнөд Солонгос эмэгтэйчүүдийн тэгш байдлыг хангахад ихээхэн саад бэрхшээл тулгардаг бөгөөд эрэгтэйчүүд давамгайлсан ажлын байранд бэлгийн дарамт, жендерийн хуучирсан хэвшмэл ойлголт болон бусад хэлбэрийн ялгаварлан гадуурхалтай холбоотой асуудлууд гарсаар байгаа аж. Тус улс Дэлхийн эдийн засгийн форумаас гаргасан 2022 оны дэлхийн жендерийн ялгааны индексээр 146 орноос 99 дүгээрт бичигджээ.

Эдийн засгийн хамтын ажиллагаа ба хөгжлийн олон улсын байгууллагын гаргасан судалгаанаас харахад Өмнөд Солонгос эмэгтэйчүүд эрчүүдээсээ 31.1 хувиар бага цалин авдаг байна.

Солонгос цувралд эмэгтэйчүүдийг манлайлагч, чадварлаг байдлаар ихээр харуулах болсон нь нийгэмд эмэгтэйчүүдийн эзлэх байр суурийг өөрчлөх зорилготой гэж зарим мэргэжилтнүүд дүгнэж буй.

1990-ээд он болон 2000 оны эхээр Өмнөд Солонгосын телевизийн цувралд хүйсээр ялгаварлан гадуурхсан үзэл, гэр бүлийн хүчирхийллийг ихээр харуулдаг байсныг “LulaLala” студийн гүйцэтгэх продюсер Пак Сон Юн ярьжээ. Жишээ нь, 1980-2002 оны хооронд үргэлжлэн гарсан телевизийн хамгийн олон ангит урт цувралуудын нэг болох “Country Diares” кинонд нөхрүүддээ зодуулдаг эмэгтэй дүрүүд гардаг. Харин 2000 оны дунд үеэс эхлэн романтик кино ихээр хийгдэх болж ядуу эмэгтэйчүүд баян чинээлэг эртэй хайр сэтгэлийн холбоотой болдог үйл явдлыг түгээмэл дүрслэх болсон. “My Lovely Sam Soon” (2005), “Coffee Prince” (2007), ”Boys Over Flowers” (2009) кинонуудыг үүнд жишээ болгон дурдаж болно. Гэхдээ энэ нь баян эртэй учрах нь аз жаргалд хүрэх зам гэсэн ойлголтыг нийгэмд бий болгож байна гэсэн шүүмжлэлд өртөж байсан.

Телевизийн бүтээлд тухайн цаг үеийн нийгмийн байдал тусгагддаг гэж 1999 онд MBC телевизээс ажлын гараагаа эхэлсэн найруулагч Пак үзэж байна. Эмэгтэйчүүд 20 нас дөнгөж гараад хүнтэй гэрлэн хүүхэд төрүүлдэг гэсэн нийтлэг ойлголттой байсан үед буюу 1994 онд дэлгэцэнд гарсан “One of a Pair” киноны 26 настай эмэгтэйн дүр гэрлэхэд оройтсон дүрд тооцогддог байжээ. 2005 онд гарсан “My Lovely Sam Soon” киноны 29 настай эмэгтэйн дүр мөн л ийм шүүмжлэлд өртөж байсан.

Харин сүүлийн жилүүдэд энэ үзэл өөрчлөгдөж Солонгос эмэгтэйчүүд гэрлэж, хүүхэдтэй болох нь цөөрсөн учир хүн ам зүйн хямралаас сэргийлж Засгийн газраас нь төрөлтийг нэмэгдүүлэх бодлого хэрэгжүүлэх болсон. Өнөө цагт Солонгос эмэгтэйчүүдийн гэрлэх дундаж нас хойшлогдоод зогсохгүй хүнтэй гэрлэхгүй байхыг илүүд үзэж, гэрлэхээс сайн дураараа татгалздаг “bihon” гэсэн нэр томьёо хүртэл шинээр бий болжээ. Нийгмийн энэ үзэгдлийг дагаад сүүлийн жилүүдэд хийгдэж буй кинонд хүртэл гэрлэх талаар санаа тавьдаг эмэгтэй дүрийг олоход тун хэцүү болжээ. Аз жаргалтай төгсгөлд заавал гэрлэлт шаардлагагүй гэж үзэх болсон бөгөөд эмэгтэйчүүд өөрсдийнхөө хүслээр амьдарч, амжилтад хүрч байгааг харуулсан кино ч ихээр хийгдэх болжээ.

Торонтогийн их сургуулийн Зүүн Ази судлалын тэнхимийн туслах профессор Мишель Чо хэлэхдээ Солонгос драмд сүүлийн үед хувь хүний хөгжил, нөхөрлөлийг илүү ихээр харуулахыг зорьдог болсон гэжээ. Өмнө нь энгийн ажилчин бүсгүй баян эртэй танилцан хайр сэтгэлтэйгээ учирч байгааг харуулсан түгээмэл дүрүүд өнөө цагт өөрчлөгдөж байгааг “Crash Landing on you” киногаар тэрээр жишээ болгосон байна. Өмнөд Солонгост төдийгүй олон улсад ихээхэн шуугиан дэгдээж, амжилт олсон тус кинонд романтик хайр сэтгэлийг харуулдаг ч эмэгтэй гол дүрийг томоохон компанийн хүчирхэг захирал бүсгүйгээр дүрсэлсэн.

Эмэгтэйчүүдийн манлайлал, чадварлаг байдлыг харуулсан солонгос кинонууд эмэгтэйчүүдэд  илүү их итгэл найдвар төрүүлэх болсон байна. Киноны ихэнх найруулагчид эмэгтэй байгаа нь энэхүү шинэ чиг хандлагад мөн нөлөөлж буй. Солонгосын эмэгтэй найруулагчид өөрийнхөө болон бусад эмэгтэйчүүдийнхээ дуу хоолойг уран бүтээлээрээ дамжуулан нийгэмд хүргэхийг зорьж байна гэж зарим кино шүүмжлэгч үзэж буй. Олон улсын кино наадам дээр ч гэсэн эмэгтэй найруулагчдын бүтээсэн солонгос киног танилцуулах нь их болжээ. 2018 онд өргөн нэвтрүүлгийн зохиолчдын холбооноос танилцуулсан судалгаагаар Солонгосын телевизийн зохиолчдын 94.6 хувь нь эмэгтэй байжээ.

Феминист үзэл дэлгэрснээр эмэгтэйчүүд бие биетэйгээ эв санааны нэгдэлтэй болж, жендерийн асуудалд санаа зовоосон зүйлсийг чөлөөтэй илэрхийлдэг болж улмаар эдгээр сэдвийг хөндсөн түүхүүд ч гэсэн эмэгтэй үзэгчдийн сэтгэлийг хөдөлгөх болсон байна.

Олон улсад бестселлер болсон “1982 онд төрсөн Ким Жи Ён” номын зохиолыг 2019 онд дэлгэцийн бүтээл болгосон нь ихээхэн амжилт олсон. Хүссэн ажлаа хийж чадахгүй хүүхдээ харан гэртээ суугаа жирийн нэгэн гэрийн эзэгтэй депресс, хүйсийн ялгаварлан гадуурхалт, тэгш бус байдалтай хэрхэн тэмцэж байгааг энэ кинонд өгүүлдэг. Тус кино нь ихэнх гэрийн эзэгтэйд тулгардаг асуудлуудыг хөндөж чадсан нь амжилтад хүрэхэд нь нөлөөлсөн гэж кино шүүмжлэгчид үздэг байна.

“Ер бусын өмгөөлөгч Ву” киноны гол дүр нь эмэгтэй байсан нь шинэлэг болсон гэж ENA-ийн маркетингийн менежер Ким хэлж буй. Учир нь, өмнө нь мөрдөгчөөс эхлээд өмгөөлөгч, шүүгч, гангстер гэх зэрэг бүхий л дүрд эрчүүд тоглон үзэгчдийн сонирхлыг татах нь буурсан тул эрчүүдийн түүхийг эмэгтэйчүүдийн түүхээр солих төдийд л шинэлэг болж чаджээ.