Америкийн “Time” сэтгүүл Украины Ерөнхийлөгч Володимир Зеленскийг оны онцлох хүнээр тодруулжээ. Өмнө нь Британийн “Financial Times” сонин түүнийг мөн оны хүнээр нэрлэж байсан.

44 настай Володимир Зеленскийг оны хүнээр шалгаруулахад хамгийн хялбар, эргэлзээгүй шийдвэр байсан гэж Time сэтгүүлийн редакциас мэдэгджээ. Украины дайн зарим нэгэнд итгэл найдвар, заримд нь айдас төрүүлж байгаа ч Зеленский сүүлийн хэдэн арван жил дэлхийг хэн ч донсолгож байгаагүйгээр донсолгож чадсан гэжээ.

Түрэмгийлэл эхэлсэн эхний өдрөөс Зеленский зарим удирдагчид шиг зугтахгүйгээр эх орондоо үлдэж Оросын эсрэг тулаанд ард түмэндээ урам зориг өгч, ардчиллын бэлгэ тэмдэг болж чадсан гэж Time онцолсон байна.

Өмнө нь жүжигчин байсан Володимир Зеленский 2019 оноос хойш Украины Ерөнхийлөгчөөр ажиллаж байгаа юм.

Time сэтгүүлээс 1927 оноос хойш жил бүр шалгаруулдаг оны онцлох хүнээр өнгөрсөн онд Илон Маск шалгарч байв.