Улсын дуурь, бүжгийн эрдмийн театрын гоцлол дууны ангийн 70 жилийн ой энэ жил тохиож байна. 1951 онд Хөгжимт драматик театрт нэгэн дэвшил гарсан нь Б.Дамдинсүрэнгийн “Жаргалын зам” дуурь тавигдсантай салшгүй холбоотой. Уг дуурьт гоцлол дуучид ачааны хүндийг үүрсэн нь Хөгжимт драматик театрын бүрэлдэхүүнд гоцлол дуучид гэсэн бие даасан уран бүтээлчид байх ёстойг харуулжээ. Тиймээс 1952 оны аравдугаар сарын 6-ны өдөр театрын дарга Н.Цэгмэдийн тушаалаар Л.Цогзолмаа, Ц.Пүрэвдорж, Д.Пүрэвсүрэн, Ж.Дорждагва, Ц.Дагванамдал, Д.Баатар, О.Даваадорж, Д.Чулуун, М.Нямсүрэн, Д. Долгоржав, М. Шинэхүү, В.Долгор нарын бүрэлдэхүүнтэй гоцлол дууны анги байгуулагдсан түүхтэй.
Гоцлол дууны анги үүсэн байгуулагдсан 70 жилийн түүхэнд Хөдөлмөрийн баатар, ардын жүжигчин, XX зууны манлай дуурийн эрэгтэй дуучин Ц.Пүрэвдорж, Хөдөлмөрийн баатар, ардын жүжгчин Г.Хайдав, ардын жүжигчин Д.Жаргалсайхан, А.Хавлааш, А.Загдсүрэн, Ч.Мөнхшүр, А.Долгор, А.Дашпэлжээ, Б.Жавзандулам, А.Энхтайван, Э.Амартүвшин, Төрийн шагналт, ардын жүжигчин, XX дууны манлай дуурийн эмэгтэй дуучин Х.Уртнасан, гавьяат жүжигчин А.Бүтэд, П.Цэвэлсүрэн, О.Ичинхорлоо, М.Ерөө, М.Найдалмаа, Б.Цэцгээ, Т.Баясгалан, Г.Эрдэнэбат, Ц.Түвшинтөгс, М.Болд зэрэг олон алдартай дуучид төрөн гарсан юм.
Монгол Улсад дуурийн урлагийг хөгжүүлж, сонгодог соёлыг түгээхэд гоцлол дууны ангийнхан хүндтэй үүргийг хүлээсэн билээ.
Тэгвэл гоцлол дууны ангийн 70 жилийн ойд зориулсан “Гранд опера” хүндэтгэлийн тоглолт энэ ням гарагт /2022.12.04/ болох гэж байна. Дэлхийн дуурийн аринуудыг ДБЭТ-ын гоцлол дууны ангийнхан нэгэн дор толилуулах юм.
