Сүүлийн 24 цагийн хугацаанд Ормузын хоолойн ойролцоо үл мэдэгдэх сум, пуужингийн дайралтад өртсөн хоёр ачааны хөлөг тус тусдаа осолдож, живсэн байна. Энэ нь Иран стратегийн чухал усан замд хяналтаа эргүүлэн тогтоохыг оролдож, довтолгоогоо эрчимжүүлж буйг харууллаа.
Сингапурт бүртгэлтэй, чингэлэг тээвэрлэгч GFS Pride хөлөг мягмар гарагт Ормузын хоолойгоор дамжин өнгөрөх үедээ дайралтад өртөж, гал гарсны дараа живсэн гэж Сингапурын Далайн болон боомтын захиргаа мэдээлжээ. Багийн бүх гишүүнийг эсэн мэнд нүүлгэн шилжүүлсэн байна.
Ираны төрийн мэдлийн Press TV суваг уг хөлөг “зөвшөөрөлгүй чиглэлээр явж байхдаа далайн минад өртсөн” гэж мэдээлжээ. Гэвч шинжээчид энэ тайлбарт эргэлзэж, нисгэгчгүй нисэх төхөөрөмжийн дайралтад өртсөн байх магадлал өндөр гэж үзлээ.
Антигуа ба Барбуда улсын бүртгэлтэй Cape Dao худалдааны хөлөг мөн живсэн гэж Олон улсын далайн байгууллага (IMO) лхагва гарагт мэдээлжээ. Уг хөлөг есдүгээр сарын 23-нд анх удаа сум, пуужингийн дайралтад өртсөн байна. Энэтхэгийн нэг далайчин амиа алджээ.
Энэ онд Ормузын хоолойд олон хөлөг дайралтад өртсөн боловч хоёрдугаар сард Ираны дайн эхэлснээс хойш Ойрхи Дорнодын бүс нутагт живсэн хөлөг одоогоор ердөө хоёр, гурав дахь тохиолдол нь болж байгааг Олон улсын далайн байгууллагын мэдээлэл харуулж байна.
Далайн тээврийн мэдээлэл хянадаг Kpler компанийн тооцоогоор даваа гарагт Ормузын хоолойгоор ердөө 4.147 сая баррель газрын тос амжилттай тээвэрлэгдсэн нь дайнаас өмнөх үеийн хэмжээнээс дөрөвний нэг хүрэхгүй үзүүлэлт юм. Мөн аравдугаар сарын эхнээс хойш Ормузын хоолойгоор дамжин өнгөрөх газрын тосны урсгалын долоо хоногийн дундаж хэмжээ огцом буурсныг Kpler-ийн мэдээлэл харуулжээ.
“Сингапурын далбаатай GFS Pride хөлөг живсэн нь арилжааны хөлөг онгоцууд бараг өдөр бүр халдлагад өртсөн хэдэн долоо хоногийн дараа аюултай хурцадмал байдал улам нэмэгдсэнийг харуулж байна. Иран далайн мина гэж мэдэгдэж байгаа ч нисгэгчгүй төхөөрөмжийн дайралт байх магадлал илүү өндөр” гэж АНУ-ын Тэнгисийн цэргийн хүчний офицер асан, мөн Ираны цөмийн хөтөлбөрийг эсэргүүцдэг, хориг арга хэмжээний зөрчлийг хянаж мэдээлдэг ашгийн бус байгууллага болох United Against Nuclear Iran-ын ахлах зөвлөх Чарли Браун хэлжээ.
