УИХ-ын Хууль зүйн байнгын хорооны хуралдаанаар хүн худалдаалах гэмт хэрэгтэй тэмцэх чиглэлээр хэрэгжүүлж буй арга хэмжээний талаарх Засгийн газрын мэдээлэл сонслоо. Энэ үеэр дараах хэлэлцүүлэг өрнөв.

УИХ-ын гишүүн П.Сайнзориг: -АНУ-ын төрийн департментын веб сайтад манайхтай холбоотой, тэр бүү хэл манай зарим улстөрчдийн нэр гарч ирээд байна. "Монгол охидтой цагийг өнгөрөөх", "Монгол охидын виз гараагүй байна" гэх мэт бичвэрүүд гарч ирээд байна. Үүнийг шалгаж байгаа юу. Зарим орд газрын нэр ч гарч ирээд байна. Цаг үеийг нь тооцохоор Дубайн гэрээг байгуулсан үетэй уялдаж байгаа. 

ЦЕГ-ын тэргүүн дэд дарга Э.Ганчулуун: -ЦЕГ энэ асуудлыг судалж байгаа. Дэлгэрэнгүй мэдээллийг танд дараа нь хүргүүлье. 

УИХ-ын гишүүн П.Сайнзориг: -Надад өгөх яах вэ. Олон нийтэд мэдээлэл өгөх хэрэгтэй. Монгол Улсын Төрийн тэргүүнээр ажиллаж байсан Ц.Элбэгдорж болон Ч.Сайханбилэг,  Гадаад хэргийн сайд байсан Л.Пүрэвсүрэн гээд хүмүүсийн нэр дурдагдаад байна.

УИХ-ын гишүүн Б.Баярбаатар: -Энэ бол цахим орчинд явж байгаа мэдээлэл биш шүү. АНУ-ын Хууль зүйн яамны албан ёсны цахим хуудсанд байгаа мэдээлэл.

ЦЕГ-ын тэргүүн дэд дарга Э.Ганчулуун: -Манайх АНУ-тай эрх зүйн харилцан туслалцаа байхгүй. Тиймээс бид албан бус байдлаар мэдээлэл авч байгаа.