Дөрөвдүгээр сарын 12-ны ням гарагт болсон Унгарын парламентын сонгууль нь коммунист дэглэмийн дараах үеийн түүхэн дэх хамгийн өндөр ирцтэй сонгууль болжээ.

Үндэсний Сонгуулийн хорооны мэдээлснээр санал өгөх эрхтэй иргэдийн бараг 78 хувь нь сонгуульд оролцсон байна.

Унгарын Ерөнхий сайд Виктор Орбан парламентын сонгуульд ялагдсанаа хүлээн зөвшөөрч, 16 жил үргэлжилсэн засаглалаа дуусгав. Тэрээр төв-барууны сөрөг хүчний Тиса намын удирдагч Петер Магярт баяр хүргэж, сонгуулийн үр дүнг “өвдөлттэй” боловч “тодорхой” байлаа хэмээн тодорхойлжээ.

Сонгуулийн албаныхны мэдээлснээр саналын 98%-ийг тоолсны дараа Магярын Тиса нам парламентын суудлын гуравны хоёрыг авч үнэмлэхүй ялалт байгуулсан нь тодорхой болжээ. Олон хүн түүнийг Орбаны хийсэн маргаантай өөрчлөлтүүдийн заримыг буцааж чадна гэж найдаж байна.

Магярын үнэмлэхүй ялалт Европын бусад удирдагчдад тайвшрал авчрах төлөвтэй. Орбан Европын Холбооны бодлогод байнга саад болж ирсэн нэгэн байсан. Харин энэ нь АНУ-ын Ерөнхийлөгч Доналд Трампт цохилт болох юм. Тэрээр сонгуулийн үеэр үндсэрхэг үзэлт, Орост ээлтэй бодлого явуулдаг Орбаныг дэмжиж байсан.

Магяр авлигатай тэмцэхээ амласан бөгөөд мөн Унгарын зогсонги байдалд орсон эдийн засаг, муу эрүүл мэндийн тогтолцоо зэрэг дотоод асуудлуудыг онцолсон. Харин Орбан Унгар улс Украины дайнд татагдан орж болзошгүй гэсэн айдсыг өдөөж, санал авахыг оролдсон юм. Магяр ялалтын баярт цугласан олонд хандан “Бид хамтдаа Унгарыг Орбаны дэглэмээс чөлөөллөө” гэж мэдэгджээ.

Энэ сонгуулийг Унгар болон Европын ирээдүйд чухал нөлөөтэй гэж үзсэн тул сонгогчдын ирц түүхэн өндөр байсан гэж мэдээлэв. Орбаны ялагдал нь Владимир Путинд цохилт болж байна.