НҮБ даваа гарагт нийтэлсэн шинэ тайландаа 2025 он нь Орос улс Украины эсрэг бүрэн хэмжээний дайралт эхлүүлснээс хойших хамгийн олон энгийн иргэн амь үрэгдсэн жил болсныг мэдэгдлээ. Өнгөрсөн онд 2500 гаруй энгийн иргэн амиа алдсан байна.
Украин дахь НҮБ-ын Хүний эрхийн хяналтын албаны мэдээлснээр, 2025 онд Орос, Украины мөргөлдөөнтэй холбоотой хүчирхийллийн улмаас 2514 энгийн иргэн амиа алдаж, 12142 хүн шархадсан болохыг баталгаажсан бөгөөд амиа алдагсад бараг бүгдээрээ Украины хяналтад байгаа бүс нутагт хийсэн халдлагад үрэгдсэн байна.
НҮБ-ын тайлангаас харахад Украинд аюулгүй газар гэж бараг үгүй болжээ. Амь үрэгдсэн болон шархадсан энгийн иргэдийн гуравны нэгээс илүү нь Оросын халдлагын үед фронтын шугамаас хол бүс нутагт байсан аж.
2025 онд Орос улс Украины хотуудын эсрэг агаарын довтолгоогоо эрс нэмэгдүүлж, нисгэгчгүй онгоц болон пуужингийн өргөн цар хүрээтэй дайралтаар энгийн иргэдийг байнга айлган сүрдүүлж байв.
Өнгөрсөн долоо хоногт болсон нэгэн ийм халдлагын үеэр Москва нэг шөнийн дотор 242 дрон, 14 баллистик пуужин, 22 далавчит пуужин харван, хэд хэдэн хотын иргэний эрчим хүчний дэд бүтцийг онилсноор хэдэн зуун мянган хүнийг цахилгаан, дулаангүй үлдээжээ.
НҮБ-ын мэдээлснээр, 2025 онд бүртгэгдсэн энгийн иргэдийн хохирол 2024 оныхоос 31 хувиар, 2023 оныхоос 70 хувиар тус тус өссөн байна.
“Энэ өсөлт нь зөвхөн фронтын шугам дагуух тулалдаан ширүүссэнээс бус, алсын тусгалтай зэвсгийн хэрэглээ өргөжсөн нь улс даяарх энгийн иргэдийг илүү их эрсдэлд оруулсантай холбоотой” хэмээн Украин дахь НҮБ-ын хяналтын албаны тэргүүн Даниэль Белл онцолжээ.
НҮБ-ын мэдээлснээр хамгийн олон хүний амь үрэгдсэн халдлага 11-р сарын 19-нд баруун Украины Тернополь хотод болсон байна. Уг цохилтын улмаас дор хаяж 38 энгийн иргэн, түүний дотор найман хүүхэд амиа алдаж, 99 хүн, үүнээс 17 нь хүүхэд шархаджээ. Мөн 10 айл тус бүр хоёр буюу түүнээс олон гэр бүлийн гишүүнээ алдсан байна.
НҮБ-ын баталгаажуулж чадсан мэдээллээр, Орос улс 2022 оны 2-р сард бүрэн хэмжээний дайнаа эхлүүлснээс хойш нийтдээ 14 900 гаруй энгийн иргэн амиа алдсан байна.
Гэвч НҮБ өмнө нь бодит тоо үүнээс өндөр байх магадлалтайг анхааруулж байсан бөгөөд учир нь олон тохиолдол “баталгаажуулалт хүлээж байгаа”, мөн эзлэгдсэн нутаг дэвсгэрт нэвтрэх боломжгүй, фронтын ойролцоох бүсүүдэд хязгаарлагдмал хандалттай байгааг онцолжээ.
