Шинээр санал болгож буй 80 хоригийн жагсаалт нь ОХУ-ын “цэрэг-аж үйлдвэрийн цогцолбор, хүний эрх зөрчигчид болон суртал ухуулагчдыг” онилжээ.
Европын Холбоо ОХУ-ын эдийн засагт учруулсан 1.5 их наяд ам.долларын хохирлыг улам нэмэгдүүлэхийн тулд хориг арга хэмжээний хүрээгээ өргөжүүлэхээр ажиллаж байна.
ЕХ-ны Гадаад бодлогын дээд төлөөлөгч Кажа Каллас Кипрт болсон ЕХ-ны Батлан хамгаалахын сайд нарын албан бус уулзалтын дараа сэтгүүлчдэд мэдээлэл өгөхдөө, Украин дахь дайныг дэмжиж буй нэмэлт 80 байгууллага, хувь хүнд шинэ хориг тавих асуудлыг хэлэлцэж байгаа талаар мэдэгджээ.
Калласын хэлснээр, ОХУ-ын “цэрэг-аж үйлдвэрийн цогцолбор, хүний эрх зөрчигчид болон суртал ухуулагчид”-ыг чиглэсэн шинэ хоригийн санал боловсруулагдсан аж.
“Путин мөнгө, хүн хүч, эрч хүчээ алдаж байна” гэж Каллас хэлээд барууны хориг арга хэмжээнүүд ОХУ-д аль хэдийн 1.2–1.5 их наяд ам.долларын хохирол учруулсан гэдгийг онцоллоо.
“Яг энэ шалтгаанаар Орос улс Украины энгийн иргэдэд чиглэсэн довтолгоогоо эрчимжүүлж байна. Харин бид тоосго тоосгоор нь Оросын дайны эдийн засгийн суурийг нурааж байна” гэж Каллас хэлжээ.
Сайд нарын уулзалтаар мөн Украинд нийлүүлсэн зэвсгийн зардлыг нөхөн төлөх зорилготой, өмнө нь маргаантай байсан 6.6 тэрбум еврогийн сангийн ирээдүйн талаар хэлэлцжээ.
Унгар улс дөрөвдүгээр сард ОХУ-ын Ерөнхийлөгч Владимир Путинтэй ойр харилцаатай байсан Виктор Орбаныг орлож Ерөнхий сайд болсон Петер Магяарын үед анх удаа томоохон байр сууриа өөрчилж, уг санг эсэргүүцэж ирсэн олон жилийн байр сууриа орхихоо ЕХ-ны гишүүн орнуудад мэдэгдсэн.
Каллас энэхүү хөрөнгийг зөвхөн өмнө нь нийлүүлсэн зэвсгийн зардлыг нөхөн төлөхөд бус, мөн хамтарсан зэвсгийн худалдан авалт болон ЕХ-ны цэргийн тусламжийг санхүүжүүлэхэд ашиглах санал гаргажээ.
АНУ байр сууриа зөөлрүүлж эхэлсэнтэй зэрэгцэн ЕХ Москвад үзүүлэх дарамтаа нэмэгдүүлэхийг эрмэлзэж байна.
Гуравдугаар сард тус холбоо 2600 орчим хувь хүн, байгууллагыг хамарсан хоригийг сунгаж, аяллын хязгаарлалт болон хөрөнгө царцаах арга хэмжээг үргэлжлүүлсэн юм.
Харин АНУ-ын хувьд Оросын газрын тос болон нефтийн бүтээгдэхүүн худалдан авч буй улс орнуудад зориулсан хоригийн чөлөөлөлтийг сунгасан нь шүүмжлэл дагуулжээ. Энэ шийдвэр нь АНУ-Израилийн Ирантай хийж буй дайнаас үүдэн эрчим хүчний зах зээлд үүссэн тогтворгүй байдлын хариу арга хэмжээ гэж тайлбарлагдсан байна.
