Цар тахлаас шалтгаалж одоо дэлхийн 23 улс ерөнхий боловсролын сургуулийнхаа үйл ажиллагааг бүрэн зогсоогоод байгаа талаар НҮБ-ын Хүүхдийн сангаас мэдээллээ. Үүний улмаас 147 сая хүүхэд хичээл завсардаж байгаа аж. Амьдралын бололцоо тааруу айлын хүүхдүүд, тэр дундаа охидууд сургууль эргэн нээгдсэн ч хичээлдээ явалгүй хаядаг байдал өмнөх хоёр жилд амьдрал дээр ажиглагдсан тул тус байгууллагаас ихээхэн санаа зовж байгаагаа илэрхийлжээ. Гүйцэтгэх захирал Кэтрин Расселл цар тахлын чимээгүй хохирогчид нь хүүхэд болж буйд сэтгэл ихээхэн түгшиж байгаагаа илэрхийлсэн байна. 2020 оны гуравдугаар сард гэхэд л дэлхийн 150 улс ерөнхий боловсролын сургуулиа бүрэн, өөр 10 улс хэсэгчлэн хаагаад байсан билээ.