Тонгагийн арлуудын нэгэнд орших галт уул дэлбэрснээс үүссэн цунами ойр орчмын арлуудыг нэрвэснээс хойш тус улсын Засгийн газраас ан удаа албан ёсны мэдэгдэл хийжээ. Энэ талаар дэлгэрэнгүй мэдээлэл ВВС агентлагийн цахим хуудаст тавигдсан байна. Засгийн газар мэдэгдэлдээ энэ удаагийн цунамиг улсын түүхэнд урьд өмнө тохиолдож байгаагүй гамшиг хэмээн тэмдэглэжээ.
Тонгаг гадаад ертөнцтэй холбодог гол суваг нь далайн ёроолоор тавьсан кабель бөгөөд гамшгийн үеэр тасарчээ. Галт уул дэлбэрсэн арлын ихэнх нь далайн усанд живсэн бол бусад арлын эрэг орчмын барилга байшингууд устаж, суурин газрууд зузаан үнсээр бүрхэгдсэн байна. Арлын төв хэсгээр хохирол харьцангуй бага байгаа талаар Засгийн газрын мэдэгдэлд дурджээ. Хамгийн то арал болох Тонгатупуд орших нийслэлийн нисэх онгоцны буудал гамшигт өрөөгүй ч үнс тортогноос болоод гадаад ертөнцөөс тусламж очиход хүндрэлтэй байдал үүссэн байна. Сайн дурынхан онгоц буух зурвасыг цэвэрлэж байгаа аж.
НҮБ-аас онга улс гамшигт өртөж их хохирол амссан талаар мэдэгдэл гаргасан байна.
Тонгатупу арлаас хойш оршдог жижиг арлуудын нөхцөл байдал хэрхсэн нь мэдэгдэхгүй эрх баригчдын санааг ихээр зовоож байгаа юм байна. Эхнээсээ маш эмгэнэлтэй мэдээлэл ирсэн нь ингэж зовниход хүргэжээ. 50 орчим хүн оршин суудаг нэг арлын бүх байшин устсан бол өөр нэг арал дээр хоёрхон байшин үлдсэн гэсэн мэдээ ирсэн аж. Бусад арал ч адил нөхцөл байдалтай гэсэн аман мэдээлэл байгаа юм байна.
Австрали улс нисэх буудлыг цэвэрлэж, онгоц буух боломжтой болмогц тусламж ачсан С-130 онгоц илгээхээ мэдэгдээд байна. Шинэ Зеланд мөн HMNZS Wellington, HMNZS Aotearoa хоёр хөлгөө илгээхээр болжээ. Хөлөгт ундны ус болон бусад шаардлагатай зүйлсийг ачсан гэнэ.
Галт уул байсан Хунга-Тонга-Хунга-Хаапай арал төв хэсгээрээ усан дор орж, хоёр үзүүрийн жаахан хэсэг нь л үлджээ.
