Монгол Улсын 2.3 сая иргэний дөрвөн сая орчим мэдээллийг 700 ам.доллараар худалдаалж байна гэх зар хакеруудын сайтад байршсан.
Тухайлбал, 2015 онд байгуулагдсан 700 мянган орчим гишүүнтэй Raidforums сайтад "PieWithNothing" гэх нэртэй хэрэглэгч Монгол Улсын 2.3 сая иргэний нэр, овог, утасны дугаар, и-мэйл хаяг, гэрийн хаяг, ажил, регистрийн дугаар, хэрэглэгчийн болон бусад мэдээллүүдийг зарж байгаа талаар бичсэн юм. 2019 оны есдүгээр сард элссэн уг хэрэглэгч "Хэрвээ энэ мэдээллийг худалдаж авахыг хүсвэл та над руу зурвас бичнэ үү" гэж бичсэн байв. Тэгвэл Хууль зүйн болон Инновац, цахим бодлогын байнгын хорооны хамтарсан хуралдаанаар Хүний хувийн мэдээлэл хамгаалах тухай хуулийн төслийг хэлэлцэх үеэр Тагнуулын Ерөнхий газрын албан тушаалтан энэ талаар мэдээлэл өглөө. Тагнуулын ерөнхий газрын Мэдээллийн аюулгүй байдлын газрын дарга Э.Эрдэнэ “Дансны дугаар болон ил тавигдсан мэдээллээс харахад тус сайт дээр тавигдсан мэдээллүүд Хаан банкнаас алдагдсан гэж дүгнэсэн. Манайхаас ажлын хэсгүүд гарган шалгаж байгаа” гэсэн юм.
