Нөхөн сонгуулийн ирц хүрээгүй тул нэмэлт санал хураалт явуулахаар боллоо

Энэ удаагийн нөхөн сонгуулийг зохион байгуулахад  төсвөөс 2.2 тэрбум зарцуулж 148 хэсгийн хороонд 2,500 орчим албан хаагч иргэдийн саналыг өгүүлэхээр ажиллаж байгаа. Монгол Улсын Их Хурлын 18, 28 дугаар тойргийн нөхөн сонгуулийн санал хураалт 22:00 цагт өндөрлөлөө. СЕХ-ноос хэсгийн хороодын ирүүлсэн дүн мэдээг нэгтгэн танилцуулж байна. 

СЕХ-ны дарга П.Дэлгэрнаран "148 хэсгийн хороо хаалгаа барьсан. Ирц хүрсэн эс хүрснээс үл хамаараад үр дүнг дэлгэцээр танилцуулна" гэж мэдээлсэн юм.

Сонгинохайрхан дүүрэгт ирц 39.56 , Хэнтий аймгийн ирц 35.80 хувьтай байлаа. Нийт 148 хэсгийн хороо хаалгаа барьж, санал хураалтыг зогсоожээ.

Ийнхүү хоёр тойрогт явуулсан нөхөн сонгуульд сонгогчдын ирц 50 хувьд хүрээгүй тул хуулийн дагуу нэмэлт сонгууль явуулахаар болж байна.

Монгол Улсын Их Хурлын сонгуулийн тухай хуулийн 78 дугаар зүйлд нэмэлт санал хураалт явуулах тухай тусгажээ. Хуулийн заалтыг дэлгэрүүлбэл, 

• 78.2.Сонгуулийн тойрогт хамаарах сонгогчдын нэрийн жагсаалтад бичигдсэн нийт сонгогчдын тавь буюу түүнээс дээш хувь нь санал хураалтад оролцоогүй бол тавин хувь нь оролцоогүй хэсэг тус бүрд нэмэлт санал хураалт явуулна.
• 78.3.Нэмэлт санал хураалтад санал нь тэнцсэн нэр дэвшигчдийг оруулах бөгөөд эхний санал хураалтад оролцоогүй, сонгогчдын нэрийн жагсаалтад бүртгэгдсэн сонгогчдыг нэмэлт санал хураалтад оролцуулна.
• 78.4.Нэмэлт санал хураалтад оролцсон сонгогчдын ирц, саналын тоог эхний санал хураалтад оролцсон сонгогчдын ирц, саналын тоо дээр нэмж тооцно.
• 78.5.Нэмэлт санал хураалтад орсон нэр дэвшигчдээс хамгийн олон санал авсан, үлдсэн мандатын тоотой тэнцүү тооны нэр дэвшигчийг Улсын Их Хурлын гишүүнээр сонгогдсонд тооцно.
• 78.6.Нэмэлт санал хураалт явуулах тухай шийдвэрийг Сонгуулийн ерөнхий хороо гаргах бөгөөд шийдвэр гарснаас хойш долоо хоногийн дотор зохион байгуулж явуулна.

---