Монгол Улсын Их Хурлын сонгуулийн 18, 28 дугаар тойрогт явагдах нөхөн сонгуулийн санал хураалт өнөөдөр болж байна.

Сонгуулийн ерөнхий хорооноос УИХ-ын нөхөн сонгуулийн санал хураалтын талаар мэдээлэл өглөө. СЕХ-ны Ажлын албаны дарга Д.Баяндүүрэн "Нөхөн сонгуулийн санал хураалт үргэлжилж байна. Энэ удаагийн сонгууль цар тахлын халдвар тархсан амаргүй нөхцөл байдалд болж байна. Мөн Хэнтий аймгийн дөрвөн суманд цас, шуурганы улмаас цахилгаан тасарсан. Өчигдөр зөөврийн хайрцгаар санал авах ажиллагаа явагдсан. Хэнтий аймагт 178 чиглэлд зөөврийн хайрцгаар сонгогчдоос санал авсан бол Сонгинохайрхан дүүрэгт 114 чиглэлд зөөврийн хайрцгаар санал авах үйл ажиллагааг зохион байгуулсан.

Зөөврийн хайрцгаар санал авах үед сонгогч тусгаарлалтын байрнаасаа гарсан, хаяг дээрээ байхгүй зэрэг нөхцөл байдал үүсэж байсан.

Өнөөдрийн 12:00 цагийн байдлаар 18 дугаар тойргийн сонгогчдын нэрийн жагсаалтад бүртгэгдсэн 5,575 сонгогч буюу 10.1 хувь нь саналаа өгөөд байна. Харин 28 дугаар тойргийн 14,857 сонгогч буюу 13 хувь нь саналаа өгсөн байна. Санал авах ажиллагаа хэвийн зохион байгуулагдаж байна" гэлээ.

СЕХ-ны Хууль эрх зүйн газрын дарга Д.Бат-Эрдэнэ цаг үеийн асуудлаар мэдээлэл өглөө. Тэрээр "ЦЕГ-аас авсан мэдээллээр сонгуулийн сурталчилгааны 21 хоногийн хугацаанд Сонгуулийн тухай хууль, тогтоомж зөрчсөн тухай 46 гомдол мэдээллийг хүлээн авсан байна. Гомдлын ихэнх нь зурагт самбар эвдэлсэн, гэмтээсэн, алга болсон гэдэг зөрчлийн мэдээллүүд байсан. Одоогийн байдлаар СЕХ-нд санал хураалттай холбоотой гомдол, мэдээлэл ирээгүй байна" гэдэг мэдээлэл өглөө.