Монгол Улсын Хөдөлмөрийн баатар, Бээжингийн олимпын мөнгөн медальт О.Гүндэгмаа долоо дахь олимпдоо цэц сорьлоо.
Тэрбээр өнөөдөр буудлагын эмэгтэйчүүдийн 25 метрийн гар бууны төрөлд О.Гүндэгмаа 60 сумнаас 578 оноо авч 26-р байраар тэмцээнээ өндөрлүүлсэн.
Тус төрөлд нийт 44 тамирчин оролцсоноос хамгийн өндөр оноо авсан найман тамирчин финалд шалгарсан юм.
Тэмцээний дараа О.Гүндэгмаа сэтгэгдлээ хуваалцсан байна. Тэрбээр "Цар тахал гээд олимп хойшилсон ч бид бэлтгэлээ хийсээр байсан. Тамирчдын хувьд оролцож байгаа тэмцээнийхээ оргилд нь байхын тулд бэлтгэл хийдэг. Нэг бүсчлэлийн улсад болсон тэмцээн тул цагийн зөрүү, цаг агаарын өөрчлөлт бага байлаа. Энэ нь тамирчдад давуу тал болж болох ч миний хувьд өөрийнхөө санасанд хүрэхээр амжилт гаргаж чадсангүй.
Өмнөхөө бодвол Монголд буудлагаар хичээллэх тамирчдын тоо нэмэгдсэн. Энэ спорт нь зарлага ихтэй. Гэхдээ хүмүүсийн дэмжлэгийн ачаар бэлтгэл сургуулилалт хангалттай сайн байсан. Би хийж чаддаг зүйлээ хийсээр л явна. Намайг үргэлж дэмждэг гэр бүл, хамт олон, холбоо багийнхандаа баярлалаа. Хичээсэн ч чадсангүй" гэлээ.
