БНХАУ-руу экспортод гаргасан махны тавиураас Ковид19 илэрсэн учир махны экспорт сар гаруй хугацаанд зогсоод байна.
Тодруулбал, өнгөрсөн зургадугаар сарын сүүлээр БНХАУ-руу гаргасан адууны мах экспортолсон тавиураас коронавирус илэрсэн байна. Хятадын тал махны экспортыг зогсоохоор болсон тухайгаа албан бичгээр ирүүлсэн байна.
Энэ талаар МХЕГ-ын хэлтсийн дарга Д.Батжаргал мэдээлэл өглөө. Тэрбээр “БНХАУ-ын Эрээн дахь салбараас манайд албан ёсны бичиг ирсэн. Тодруулбал, хоёр аж ахуйн нэгжийн махан бүтээгдэхүүн ачсан тавиураас Ковид19 илэрлээ гэсэн утга бүхий албан бичиг ирсэн. МХЕГ-аас ажлын хэсэг байгуулаад, коронавирус илэрсэн хоёр компани дээр хяналт шалгалт хийсэн.
Экспорт хийсэн компаниуд тухайн үед тээврийн хэрэгсэлд ариутгал, халдваргүйжүүлэлт хийсэн байхад яагаад коронавирус гарав гэх асуудал гарсан. Тиймээс Улсын мал эмнэлэг, ариун цэврийн төв лабораториос мэргэжлийн шинжээчийг аваад, тээврийн хэрэгсэл болон махан бүтээгдэхүүний гадарга, багаж, тоног төхөөрөмж зэргээс нийт дөчин дээж авсан.
Ийнхүү шинжлэхэд халдвар илрээгүй. БНХАУ-ын талаас ийм шинжилгээ хийхэд, ийм зүйл илэрлээ гэсэн нарийн мэдээлэл ирээгүй. Махны тавиураас Ковид19 илэрлээ л гэсэн.
Ер нь цаашдаа БНХАУ-ын тавьж буй шаардлагыг хангаж, халдваргүйжүүлэх арга хэмжээ авч, Ковид19-ийн шинжилгээ хийж махаа экспортлох тал дээр МХЕГ онцгойлон анхаарах хэрэгтэй юм байна гэсэн дүгнэлт хийж байна ” гэлээ.
Манай улсад БНХАУ-руу мах, махан бүтээгдэхүүн экспортлох эрхтэй 20 орчим аж ахуйн нэгж бий. Мал эмнэлгийн ерөнхий газар экспортод гарч буй махнаас дээж авч лабораторийн шинжилгээ хийдэг байсан бол одооноос махны тавиур, тээврийн хэрэгсэл зэргийг шинжлэхээр болжээ.
Энэ талаар Улсын мал эмнэлэг, ариун цэврийн төв лабораторийн даргын үүрэг гүйцэтгэгч Б.Ганзориг мэдээллээ.
Тэрбээр “БНХАУ-ын тавьсан шаардлагын дагуу оны эцсээр мах экспортолж байгаа компаниудын үйлдвэрийн орчин, боловсруулалт явуулж буй дамжлаг зэргээс дээж авч, шинжилгээ хийсэн. Ингэхэд ямар нэг зүйл илрээгүй. Одоо махны экспорт эхлэхээр МХЕГ-тай хамтраад махны тавиур, тээврийн хэрэгсэл зэрэг газраас арчдасны дээж аваад, махтайгаа хамт өгч явуулахаар ярилцаж байна” гэлээ.
