Өнөөдрийн 15 цагаас хойш нийслэлийн дийлэнх байршилд болон Орхон, Сэлэнгэ, Дархан зэрэг хэд хэдэн аймагт цахилгаан тасарсан юм.

Тэгвэл Улаанбаатар хот болон төвийн  бүсийн аймгуудыг хангаж буй Төвийн бүсийн эрчим хүчний системийн Улаанбаатар-Эрдэнэтийг холбосон 220 кВ-ын цахилгаан дамжуулах агаарын шугамд гэмтэл гарснаас ачааллын хэлбэлзэл үүсч Улаанбаатар хот болон төвийн  бүсийн аймгуудын зарим хэсгийн хэрэглэгчдийг цахилгаан эрчим хүчээр хязгаарлаад байгааг ЭХЯ-наас мэдээллээ.

Гэмтлийг засахаар шуурхай ажлын хэсэг ажиллаж байгаа бөгөөд үе шаттайгаар эрчим хүчний хангамжийг хэвийн болгох аж.

Түүнчлэн хувийн хэвшлийн барьж байсан байгууламжийн дээврээс барилгын материал хийсэн шугаманд хүрч богино холбоо үүсгэн гэмтэл гарсан байж болзошгүй болохыг ЭХЯ-ны хэвлэлийн төлөөлөгч мэдээллээ.