Идэх хүнсийг минь Instagram тодорхойлдог

Хувцас загварын чиг хандлага байнга хувьсан өөрчлөгддөгийн адил хоол хүнсний хэрэглээнд ч орц, найрлага, түүхий эдийн мода эргэнэ. Төмс, луувангаас өөр ногоо амталж үзээгүй шахам байсан монголчууд сүүлийн арваад жилд авакоданы чанарыг дэнсэлж, чиа үртэй тараг тамшаалан хүртдэг боллоо.

Нийгмийн сүлжээний тэсрэлтийг даган хүнсний бүтээгдэхүүний сурталчилгаа, маркетинг шинэ түвшинд гарсан нь үүнд нөлөөлж буй. Басхүү хүмүүс хооллох хэв маягтаа илүүтэй анхаарч, шим тэжээлийн боловсрол нэмэгдэх болсноор зоогийн ширээг дүүргэх шинэ цэсийн тоо улирал тутам шинэчлэгдэх өнгөтэй.

Хоол шүүмжлэгч хэмээх ховор хийгээд сонихон мэргэжилтнүүд ирэх жилүүдэд ямар хүнс зонхилохыг таамаглан нийтлэл бичдэг байсан бол одоо нийгмийн сүлжээний инфлүүнзерүүд хэдхэн секундын бичлэгээрээ хүн төрөлхтний ам руу юу орохыг шийдэж байна.

The Grocer сэтгүүлийн редактор Даниэл Вулфсон

Хүмүүс маш загварлаг. Инстаграмм дээр ямар нэг хоол хүнс улиг болоод ирэхэд зөнгөөрөө л дараагийн зүйлийг эрж хайж эхэлдэг. Олноороо хошуурч, retweet хийснээр ирээдүйн чиг хандлагыг бий болгож буйгаа анзаардаггүй байх. Эсвэл биднийг ердөө ходоод маань л удирддаг юм болов уу?

Шимт чанараараа супер хүнс ангилалд өрсөлдөгчгүй тэргүүлэх авокадоны амжилт ч сайтар бодож төлөвлөсөн маркетингийн төлөвлөгөөний нэг хэсэг билээ. Өмнөд Америкийн тариаланчдын ургац дэлхийгээр тархахад Лондонд төвтэй Richmond & Towers хэмээх PR агентлаг тусалжээ. Анх 1995 онд сэтгүүлч, тогооч, эрүүл амьдралын хэв маяг сурталчлагчдаас бүрдсэн баг тэнд очиж жимсний нэр хүндийг өсгөх, дэлгүүрийн борлуулалтыг нэмэгдүүлэх алхам хийж байв. Эхний үед нөлөөлөгчдийн даалгавар маш энгийн буюу ердөө л яаж идэхийг харуулах. Тухайн үед Их Британийн авокадо борлуулалт жилд 13 сая фунт стерлинг байжээ. 2016 онд энэ тоо 150 сая болж өссөнөөр Richmond & Towers-ийн сурталчилгаа Их Британийн түүхэн дэх хамгийн амжилттай шинэ бүтээгдэхүүний кампанит ажлаар нэрлэгджээ. Нэгэн зүйл анхилуун үнэрт бутны холтсоор шингэн хүнс үйлдвэрлэдэг

Fever-Tree компани бол нийгмийн сүлжээний хүчээр дэвжсэн гарааны бизнесийн сонгодог жишээ юм. Синчона бутны холтсоор тоник ус үйлдвэрлэж анхлан зах зээлд гаргахдаа халуун бууруулах давуу чанартайг нь сурталчилж байв. Яваандаа үйлдвэрлэлээ өргөжүүлж синчона агуулсан шар айраг, ундаагаар шугамаа өргөтөж, орц хольцыг нь ч баяжуулав. Есөн жилийн дотор компанийн үнэт цаас дэлхийн зах зээлд гарч, өдгөө зах зээлийн үнэлгээ нь 360 сая долларт хүрчээ.

Facebook хэрэглэгчдийн дунд хүнс, ундаа хамгийн түгээмэл сэдэв болдог ч Instagram-ын нөлөөлөгчид илүү алдартай. Энэ платформыг ашиглагчдын 39 хувь нь хувцас загвараас илүүтэй хоолны шүтэн бишрэгч байдаг ажээ.

“Нэг фунтын хоол” номын зохиолч Мигель Барклэй

Веган хүнс үйлдвэрлэгчид нийгмийн сүлжээг чадмагаар ашиглан борлуулалтаа шинэ түвшинд гаргаж байна. Тэд хэзээ нэгэн цагт веган хэштэг ашиглаж байсан хүмүүсийг олж тогтоон, 200 нөлөөлөгчийн сүлжээ бий болгосон. Мэдээж үнэгүй бүтээгдэхүүнээр хангаж, чамин бэлэгээр бөмбөгдөнө. Гэхдээ тухайн брэндийг төлөөлж сурталчилгаа хийхдээ жор, найрлагыг нь сайтар судлан байж бусдад нөлөөлөх ёстой.

Нөлөөлөгчдөөс гадна мэргэжлийн тогооч, хоолны шоу нэвтрүүлгийн баатрууд ч шинэ хүнс бүтээхэд нөлөөтэй хэвээр. Ахлах тогооч хамгийн чанартайг сонгодог гэж хүмүүс боддог тул даган дуурайх нь тодорхой. Супермаркетууд ч ниймийн сүлжээнд юу болж байгааг байнга ажиглаж ойрын ирээдүйд агуулахаа дүүргэх бүтээгдэхүүний баримжаа авдаг.

Ойрын хугацаанд дэлхийг нийтийг байлдан дагуулж мэдэх хүнсийг танилцуулбал

 

Овьёосны сүү

Өглөөний цайндаа сүүнд дэвтээсэн нэвс хэрэглэдэг байсан бол одоо овьёосноос гаргаж авсан жинхэнэ сүү уудаг болно. Ердөө 2014 онд Шведэд байгуулагдсан “Oatly” компаний бүтээгдэхүүнүүд нийгмийн сүлжээнд алдаршиж эхэлж буй. CNN-ийн мэдээлснээр Америкийн томоохон хотуудын кофе шопт овъёосны сүү хэдийнэ чухал орцод тооцогдох болжээ. Амьтны гаралтай сүүнээс татгалздаг цагаан хоолтнууд, бүйлс болон наргил модны сүүг хэтэрхий чихэрлэг гэж үздэг хүмүүст уг бүтээгдэхүүн илүү тохиромжтой. Овъёост агуулагддаг тос, хүчиллэг чанар нь шинэ хүнсийг яг л үхрийн сүү шиг өтгөн, шим тэжээлтэй болгодог ажээ. Дээр нь үйлдвэрлэгчид бүтээгдэхүүнээ хүний гараар бүтээсэн, нүүрстөрөгчийн агууламжгүй гэж сурталчилж буй. Зах зээлийн үнэлгээ нь хэдийнэ хоёр тэрбум ам.долларт хүрээд буй “Оatly”-д АНУ-н Ерөнхийлөгч асан Д.Трампын гол хандивлагчдын нэг тэрбумтан Стивен Шварцман хөрөнгө оруулахаар болсноос харахад овьёосны сүү мөдхөн дэлхийг байлдан дагуулах нь ээ.

Нүүдэлчин сагамхай загас

Skrei (эртний норвеги хэлээр нүүдэлчин гэсэн утгатай ) буюу Баренцын тэнгисийн хүйтэн усанд өсөж үрждэг нэгэн зүйл сагамхай загас удахгүй Норвегийн экспортын гол бүтээгдэхүүн болно. Умард мөсөн далайгаас Норвегийн хойд эрэг хүртэл хэдэн мянган км туулан үржилд ордог сагамхай загасны мах нүүдлийн явцад илүү булчинлаг, цагаан өнгөтэй болдог гэнэ. Норвегийн далайн зөвлөлөөс өнгөрсөн зургаан жилийн хугацаанд дэлхий даяарх Мишелин одтой зоогийн газрууд болон бөмбөрцгийн хойд бүсийн сүлжээ дэлгүүрүүдээр дамжуулан өөрийн сагамхай загасыг улирлын чанартай агнуураар ховор баригддаг тансаг зэрэглэлийн хүнс гэсэн сурталчилгаа хангалттай явуулжээ. Норвегийн далайн хоолны нэр хүндийг өргөх үйлст сэтгүүлч, сошиал нөлөөлөгчид ч идэвхтэй оролцов. Жилд 5000-6000 тонноор хэмжигддэг байсан skrei загасны экспорт 2020 онд 19 хувиар өсжээ.

Лао Ган Ма буюу эмээгийн амтлагч

Үе уламжилж ирсэн гэрийн жороо Хятад даяар алдаршсан бүтээгдэхүүн болгосон Тао Хуаби эмээгийн түүхийг одоо дэлхий нийтээрээ мэддэг боллоо. Нэрийн гурван ханзаа тавихаас өөр бичиг үсэггүй тэрээр гоймонтой шөлний газар ажиллуулж хоногийн хоолоо залгуулдаг байв. Нэгэн үйлчлүүлэгч нь өдөржин гурилтай ноцолдож цагаа үрж сууснаас бусдаас ялгагдах гол онцлог болсон амтлагчаа савлаж зарахыг санал болгожээ. Жилийн дотор жижиг үйлдвэрээ босгож шарсан сонгино, халуун чинжүүний холимогоо цайны газрууд, дэлгүүрт борлуулж эхлэв. Өдгөө 1300 ажилтантай Тао эмээгийн амтлагч өдөрт 1.3 сая ширхэг зарагддаг. “Лао Гань ээж” нэрийн бүтээгдэхүүн ердөө 5 юанийн үнэтэй ч Тао эзэгтэй лонх бүрээсээ 0.95 юанийн ашиг хүртэн, компанийн жилийн эргэлт 2.5 тэрбум юаньд хүрчээ. Эх газартаа хангалттай танигдсан тул эдний компани зар сурталчилгаанд төдийлөн ач холбогдол өгдөггүй байв. Гэтэл сүүлийн жилүүдэд барууны орнуудад суралцах хятад оюутны тоо эрс нэмэгдсэнээр нийгмийн сүлжээнд эмээгийн амтлагч цуурайтаж эхэлжээ. Нутгийн амтаа өгүүлсэн суурин иргэд ч энэ давалгаанд нэгдэв. “Лао Ган Ма” компани өдгөө бүтээгдэхүүнээ Европ, АНУ, Австралид албан ёсны борлуулагчаар дамжуулан худалдаалж буй.

Эцэст нь хэлэхэд, бидний өдөр тутмын хоол хүнс хүртэл зах зээлийн чиг хандлагыг даган орц найрлага өөрчлөгдөж, баяжин шинэчлэгдэж эсвэл ор тас мартагдаж байдаг ажээ. Ирэх жил ямар хүнс моданд орох бол?

Эх сурвалж: Үндэстний ТОЙМ сэтгүүл. Дугаар 472

---