УИХ-ын Хүний эрхийн дэд хорооны хуралдаанаар зэвсэгт хүчний анги, салбарт гарсан хүн амины гэмт хэрэг тойрсон асуудлаар холбогдох албаны хүмүүсээс мэдээлэл сонслоо. Энэ үеэр Хүний эрхийн үндэсний комиссын гишүүн Б.Энхболд "2020 оны байдлаар цэргийн албан хаагчдаас Хүний эрхийн үндэсний комисст гомдол ирээгүй. Манайд ирдэггүй шалтгаан нь гомдол мэдээллээ дотооддоо хүлээн авч хянан шалгадаг дүрэм журамтай холбоотой. Дүрмийн бус харьцаа байна уу гэдгийг Монгол Улсад бүртгэгдсэн цэргийн албаны эсрэг гэмт хэргээр хэмжиж үзсэн. 2013-2020 онд 125 гэмт хэрэг цэргийн албанд үйлдэгдсэн байна. Үүний 98 нь хүч хэрэглэсэн нь тогтоогдож прокурорт шилжсэн байна. Тиймээс бид бүхэн цэргийн албанд дүрмийн бус харьцаа байна гэж дүгнэж байгаа. Тиймээс энэ талаар судалгаа хийхээр бэлтгэл хангаж байгаа" гэлээ.
