WeLoveU байгууллага ЭМЯ-д хамгаалалтын хувцас, зориулалтын KN95 маск хандивлалаа

Олон улсын WeLoveU байгууллага “Ковид-19” халдварт өвчнөөс урьдчилан сэргийлэхэд дэмжлэг үзүүлж ЭМЯ-д халдвараас урьдчилан сэргийлэх халдвар хамгаалалтын хувцас 200 ширхэг, KN95 маск 5000 ширхгийг хандивлав.

ЭМЯ-ны НАС-ын салбар зөвлөлийн гишүүн АУ-ы доктор Г.Халиунаа  “Дэлхий дахинд Ковид цар тахал тархсан энэ хүнд цаг үед эмч, эмнэлэгийн ажилчид маш ачаалалтай ажиллаж байгаа. Бидний ажилд хамгийн их хэрэг болдог хамгаалалтын хувцас хэрэглэл, маскийг өнөөдөр WeLoveU байгууллагынхан хандивлалаа. Эмнэлгийн байгууллагад ажиллаж байгаа нийт хүмүүсийн өмнөөс WeLoveU байгууллагынханд баярласнаа илэрхийлье” 

WeLoveU байгууллагын гишүүн Цэндцэсэм “Халуун цэг дээр ажиллан, ард иргэдээ хамгаалж буй бүх хүмүүст талархаж байна. Манай байгууллагаас бас  цар тахлын энэ хүнд  хэцүү цаг үед тэргүүн шугамд зүтгэж буй ажилчдад сэтгэлийн дэм үзүүлэхээр  5000 ширхэг N95 маск болон 200 ширхэг хамгаалалтын хувцсыг хандивлаж байна. Энэ нь хэдийгээр өчүүхэн хандив ч гэсэн, бүгдээрээ хүнд хэцүү цаг үеийг хамтдаа ялахын төлөөх сэтгэлийн дэм үзүүлж байгаа үйл ажиллагаа юм” 

2020 оны эхнээс “Ковид-19”-тэй тэмцэх ажлыг дэлхий дахинд явуулсаар ирсэн WeLoveU байгууллага Монголоос гадна дэлхийн 30 орчим улсад халдварт өвчнөөс урьдчилан сэргийлэх ажлыг өргөн цар хүрээтэй явуулж, хэрэгцээт бараа бүтээгдэхүүнээр тусалж дэмжин ажиллаж байна. Нийгмийн эмзэг бүлгийнхэнд зориулж 43,000 ширхэг амны хаалт болон гар ариутгагч хандивлан, өдөр тутмын болон хүнсний бараа бүтээгдэхүүнийг нийгмийн бүхий л салбарынханд хүргэн тусламжийн гараа сунгаж байна.

Халдварт өвчнөөс урьдчилан сэргийлэхэд хэрэгтэй бараа бүтээгдэхүүний хомсдол Энэтхэг, Мьянмар, Камбож, Бразил, Сальвадор, Конго зэрэг улсад, мөн Ази, Өмнөд Америк, Африкийн орнуудад үүссээр байна. Өмнө нь тус байгууллага Эквадор болон Лаос улсад 30,000 ширхэг амны хаалт, 2000 ширхэг оношлогооны иж бүрдэл хүргүүлж байжээ. Мөн Солонгос дахь төвөөс 20 сая воны мөнгөн тусламж үзүүлж 20,000 ширхэг (KF94) маск хандивлаж байжээ.

WeLoveU нь НҮБ-ын DGC (Хуучнаар DPI олон нийтийн мэдээллийн товчоо)-н түншлэл байгууллага. Иймдээ ч “Ковид-19”-н нөхцөл байдлын улмаас олон улсын нийгэмд тулгамдаад буй асуудлуудлыг шийдвэрлэхээр зорьж байна.

 

 

---